Эрдэнэт үйлдвэрийн инженер Австралийн Засгийн газрын тэтгэлэгт хөтөлбөрт тэнцжээ

Эрдэнэт үйлдвэрийн Цахилгаан цехийн Реле хамгаалалт, автоматикийн хэсгийн инженер М.Мөнхчимэг Австрали улсын Засгийн газраас зарласан ”Women in STEM” 100 хувийн тэтгэлэгт хөтөлбөрийн гурван шатны шалгалтад тэнцэж шалгарчээ. 
Шинжлэх ухаан, техник, инженерчлэл, боловсролын салбар дахь эмэгтэйчүүдийн шийдвэр гаргах түвшний оролцоог нэмэгдүүлэхэд чиглэсэн тус хөтөлбөрт Монгол Улсаас Боловсрол шинжлэх ухааны яам, Эрдэм шинжилгээний хүрээлэн, Шинжлэх ухааны академи, Мэргэжлийн хяналтын Ерөнхий газар, ШУТИС, МУИС зэрэг байгууллагын 20 эмэгтэй шалгарсны нэг нь Эрдэнэт үйлдвэрийн инженер М.Мөнхчимэг юм. Мөн орон нутгаас Ховд, Өмнөговь аймгаас тус бүр нэг эмэгтэй тэнцжээ. 
Тэд Австрали Улсын Брисбань хотын “Queensland”-ийн их сургуульд суралцах бөгөөд сурч мэдсэн сайн туршлагыг Эрдэнэт үйлдвэртээ хэрэгжүүлэх гарц боломжуудыг эрэлхийлж ажиллана гэж Цахилгаан цехийн Реле хамгаалалт, автоматикийн хэсгийн инженер М.Мөнхчимэг ярилаа. Тэрээр Эрдэнэт үйлдвэрийн Эмэгтэйчүүдийн холбооны удирдах зөвлөлд гишүүн, мөн Орхон аймгийн Улаан загалмайн хорооны Донорын зөвлөлийн гишүүн юм.