Баяжуулах үйлдвэрийн Нунтаглан баяжуулах хэсгийн хүдэр нунтаглалтын нэгдүгээр шатны МШЦ 5,5x6,5 маркийн наймдугаар тээрмийг бүрэн шинэчлэн сольж, ашиглалтад орууллаа. Хуучин тээрэм нь Украйн улсад үйлдвэрлэсэн НКМЗ төрлийн тээрэм бөгөөд 20 гаруй жил ашигласан байна.
Ашиглалтын явцад хуучин тээрмийн асгах талын хананд цууралт үүссэн, найдвартай ажиллагааны түвшин буурсан тул энэ оны ажлын төлөвлөгөөний дагуу шинэ тээрмээр сольжээ. Шинээр суурилуулсан тээрэм нь БНХАУ-д үндсэн хэмжээсний дагуу үйлдвэрлэгдсэн.
Хуучин тээрмийг буулгах, шинэ тээрмийн угсралт, залгалт тохируулгын ажлыг 20 хоногийн хугацаанд хийсэн бөгөөд төлөвлөгөөт цагаас өмнө буюу 484 цагт багтаан сольсноор нэмэлт бүтээгдэхүүн үйлдвэрлэх нөхцөл бүрджээ. Энэхүү ажилд Мэдээллийн технологийн болон Геологи-маркшейдерийн хэлтэс, Баяжуулах үйлдвэр, Зураг төслийн хүрээлэн, Холбоо, мэдээлэл технологийн автоматжуулалтын цех, Барилга засварын цех, Засвар угсралтын цехийн хамт олон дотоод нөөц боломжоо ашиглан амжилттай оролцлоо.
Наймдугаар тээрмийг бүрэн шинэчиллээ
Энэ мэдээ танд ямар санагдав?
0
0
0
0
0