Хамтын ажиллагаа, нийгмийн харилцааны бодлогын газрын харьяаны нийгмийн цехүүд 2024 онд “Соёлтой харилцаа, чанартай үйлчилгээ” уриан дор хүний эрхийг дээдлэн, нийгмийн харилцааг төгөлдөржүүлж, үйлчилгээний чанарыг дээшлүүлэх зорилт дэвшүүлэн ажиллаж байна. Энэ хүрээнд Спорт цогцолборын хамт олон үйл ажиллагаагаа сурталчилах өдөрлөгийг Ерөнхий захиргааны нэгдүгээр байранд өнөөдөр зохион байгууллаа.
Тус цогцолборын шигшээ багийн болон нийтийн биеийн тамир, чийрэгжүүлэлтийн багш, дасгалжуулагчид спортын секц дугуйлангуудаа ажилчдад танилцуулж газар дээр нь үнэмлэх олгож байсан бол эмнэлгийн хэсгийн баг бүрэлдэхүүн “Эрдэнэт” сувиллын цогцолборын хяналт дор түргэвчилсэн шинжилгээ авч шуурхай үйлчилгээ үзүүлэн ажиллав. Мөн Эрдэнэт үйлдвэрээс, Спорт цогцолборын “Хангарди” клубээс Монгол Улсынхаа нэрийг тив, дэлхийд дуурсгасан шилдэг тамирчдын үзүүлбэрийг дэлгэцээр танилцуулан сурталчилсан юм.
Энэ жил Спорт цогцолбор Эрдэнэт үйлдвэрийн ажилчдад болон Эрдэнэт хотын ард иргэдэд зориулж усан сан, үндэсний сур, иог, бокс, жудо, байт харваа, бадминтон, аэробек, талбайн болон ширээний теннис, сагсан бөмбөг, волейбол, фитнес, хүндийн өргөлт, хөл бөмбөг зэрэг 25 төрлийн секц дугуйлан хичээллүүлж байна. Ажилчид Спорт цогцолборын үйл ажиллагаанд сэтгэл хангалуун явдгаа энэ үеэр илэрхийлсэн нь тэднийг урамшуулж байлаа. Өдөрлөгийн үеэр 150 гаруй ажилтан өөрийн хүссэн секц дугуйландаа бүртгүүлж, үнэмлэх гардсан юм.
Энэхүү өдөрлөг маргааш Засвар механикийн заводад, энэ сарын 29-нд Дулааны цахилгаан станцад үргэлжилнэ.
Спорт цогцолборын хамт олон ажилчдад хүрч үйлчиллээ
Ш.Лхамсүрэн
Зурагчин
Энэ мэдээ танд ямар санагдав?
1
0
0
0
0