Засгийн газар Эрдэнэт үйлдвэрийн хаягдлын сан байгуулах газрын асуудлыг шийдвэрлэлээ

“Эрдэнэт үйлдвэр” ТӨҮГ-ын Баяжуулах үйлдвэрийн хаягдлын шинэ сан байгуулах газрыг улсын тусгай хэрэгцээнд авах асуудлыг Засгийн газрын 03 дугаар сарын 20-ны өдрийн хуралдаанаар шийдвэрлэлээ.  
Монгол Улсын засаг захиргаа нутаг дэвсгэрийн нэгж, түүний удирдлагын тухай хуулийн 35 дугаар зүйлийн 35.1.17, 48 дугаар зүйлийн 48.1, Засгийн газрын 2017 оны 287 дугаар тогтоолоор баталсан “Газрыг улсын тусгай хэрэгцээнд авах, гаргах, түүний хэмжээ заагийг тогтоох ашиглах журмын 3.9.7 дахь заалтыг тус тус үндэслэн Булган, Орхон  аймгийн ИТХ-ын хуралдаанаас "Эрдэнэт үйлдвэр" ТӨҮГ-ын Баяжуулах үйлдвэрийн хаягдлын шинэ санг байгуулах зориулалтаар ашиглах 7048 га газрын асуудлыг хэлэлцэн баталсныг ийнхүү баталгаажууллаа.  
Эрдэс баялгийн нөөц өсгөх төслийн үр дүнд жарнаар хэмжигдэх нөөцтэй болсон Эрдэнэт үйлдвэр цаашдын тасралтгүй үйл ажиллагаагаа хангахын тулд сүүлийн таван жилийн хугацаанд хэд хэдэн газарт хүдэргүйжүүлэлтийн, археологи болон палеонтологийн, газрын ан цав, гүний усны нарийвчилсан судалгаа,  шинжилгээ, тооцоолол хийсний үндсэн дээр уг газрыг сонгожээ. Баяжуулах үйлдвэрийн Хаягдлын шинэ сан байгуулах Техник, эдийн засгийн үндэслэл, нарийвчилсан зураг төсөл боловсруулах ажилд анх удаа олон улсын тендер зарласан бөгөөд гүйцэтгэгч компанийнхан Эрдэнэт үйлдвэрийн мэргэжилтнүүдтэй хамтран олон улсын стандартын дагуу том далан төлөвлөх, байгуулах ажлыг бичиг баримтын хэмжээнд боловсруулан ажиллаж байна. 
Эрдэнэт үйлдвэр Хаягдлын шинэ сан байгуулахдаа Хаягдал өтгөрүүлэх технологи нэвтрүүлэхээр төлөвлөсөн. Ингэснээр цагаан тоосны дэгдэлт эрс буурах, эргэлтийн усны нөөц бүрдэх зэрэг олон давуу боломж нээгдэх юм.