Олон Улсын Эмэгтэйчүүдийн эрхийг хамгаалах өдрийг тохиолдуулан “Эрдэнэт үйлдвэр” ТӨҮГ-ын Хэвлэл мэдээлэл, олон нийттэй харилцах албаны “Эрдэнэт” телевизийн уран бүтээлчид 12 дахь жилдээ “Ижийдээ захидал бичээрэй” уралдааныг зохион байгуулж, шилдгүүдийг өнөөдөр тодрууллаа.
Уг уралдааныг Монголын эмэгтэйчүүдийн холбооны салбар Орхон аймгийн Эмэгтэйчүүдийн зөвлөлтэй хамтран зохион байгуулсан бөгөөд уралдаанд нийт 123 оролцогч Ижийдээ бичсэн захидлаа илгээсэн байна.
Монголын эмэгтэйчүүдийн холбооны салбар Орхон аймгийн Эмэгтэйчүүдийн зөвлөлийн тэргүүн, “Эрдэнэт үйлдвэр” ТӨҮГ-ын Захиргаа, удирдлага, санхүүгийн газрын дарга Д.Үүрийнтуяа уралдааныг нээж хэлсэн үгэндээ: “Эрдэнэт үйлдвэрийн Хэвлэл мэдээлэл, олон нийттэй харилцах албаны “Эрдэнэт” телевиз энэ уралдааныг 12 дахь жилдээ амжилттай зохион байгуулж байна. Эдгээр захидлаар Ээж хэмээх хорвоод хосгүй гайхамшигт хүний хайр энэрэл үрсдээ хэрхэн шингэдгийг, үрийн сэтгэлд ижий холдох тусам хэрхэн мөнхөрч үлддэгийг илэрхийлэн гаргаж, нийгэмд эерэг мэдээлэл түгээхэд ач холбогдол нь оршиж байна. Бүс нутгийн хөгжлийн асуудал яригдаж буй өнөө цаг үед “Ижийдээ захидал бичээрэй” уралдааныг зөвхөн Орхон аймгаар хязгаарлахгүйгээр Хөвсгөл, Булган аймгийн хэмжээнд зохион байгуулсан нь онцлог юм. Ижийдээ захидал бичих боломжийг хүн бүхэнд олгож, энэ үйл ажиллагааг анх санаачилсан МУСТА, Нэвтрүүлэгч Пүрэвийн Энхтуяа эгчдээ чин сэтгэлийн халуун талархал илэрхийлье. Уг нэвтрүүлгийн залгамж халааг энэ жилээс сэтгүүлч Алтанхуягийн Бямбамаа өвлөн авч амжилттай зохион байгуулж байна. Энэ удаа Хөвсгөл аймаг дахь МОНЦАМЭ агентлагийн сурвалжлагч Б.Гантуяа, Булган аймгийн “Сайхан монгол” телевизийн захирал Б.Мөнхбаатар, Эрдэнэт үйлдвэрийн ХМОНХА-ны сэтгүүлч А.Бямбамаа нар захидлын уралдааныг шүүн хэлэлцэж, шилдгүүдийг тодрууллаа. Эдгээр хүмүүстээ баяр хүргэхийн ялдамд уралдаанд оролцогчдод, ижийдээ чин сэтгэлээ нээж яваа үр бүхэнд эрүүл энх, төвшин жаргалтай амьдрахын ерөөл өргөе” гэв.
Энэ хорвоод тээж төрүүлсэн ачит ээж Л.Гэрэлмаадаа зориулан бичсэн, “Сэлэнгэ” амралт, аялал жуулчлалын цогцолборын ажилтан М.Эрмүүнзаяагийн захидал уралдааны Тэргүүн байр эзэлж, өргөмжлөл, мөнгөн шагнал хүртэв. Удаах байруудад Хөвсгөл аймгийн харьяат АШУҮИС-ийн оюутан Г.Ариун-Ундрал, Булган аймгийн иргэн Б.Гантунгалаг нарын ижийдээ бичсэн захидал шалгарлаа. Харин шагналт байрыг Ус хангамжийн цехийн дарга Г.Батмөнх, Орхон аймгийн 16-р сургуулийн төгсөгч М.Өлзийжаргал нарын захидал эзлэв.
Эхний таван байрт шалгарсан захидлуудыг МЭХ-ны салбар Орхон аймгийн Эмэгтэйчүүдийн зөвлөлийн тэргүүн Д.Үүрийнтуяа, МУУГЗ Е.Баярмагнай, Хөвсгөл аймгийн ХДТ-ийн жүжигчин А.Наранхүү, МЗЭ-ийн шагналт, яруу найрагч Н.Батжаргал, МУСТА, нэвтрүүлэгч П.Энхтуяа нар уншиж, тэнд хуран цугласан хүмүүсийн сонорыг мялаав.
Түүнчлэн, Эрдэнэт үйлдвэр, Орхон аймаг болон бүс нутгийн ард иргэдэд захидал бичих соёлыг түгээн дэлгэрүүлэх, зохион бичих, дурсамжаа урнаар сэтгэх, бичгийн хэлний чадварыг дээшлүүлэх, ээжийгээ баярлуулах, хэлж амжаагүй сэтгэлийн үгээ захидлаар дамжуулж илэрхийлэхэд энэ уралдааны зорилго оршиж байв.
Нар минутад мандаж минутад жаргана.
Үс засуулвал: 
Суудал: 
