Эрдэнэт үйлдвэрийн Автотээврийн цехийн жолооч нар малчдад өвс, тэжээл, тусламжийн бараа хүргэхээр Архангай аймгийн зүг хөдөллөө.
Монгол орны нутаг дэвсгэрийн 80 хувь нь цасан бүрхүүлд хучигдаж, өвөлжилт, хаваржилт хүндэрч зудын байдалтай байгаа энэ үед Эрдэнэт үйлдвэр цасанд хаагдсан зам, давааг нээхэд хүнд машин техникээр туслах, өвс тэжээл тээвэрлэн хүргэх зориулалтаар туулах чадвар сайтай техник хэрэгслийн туслалцаа үзүүлэн нийгмийн хариуцлагаа хэрэгжүүлэн ажиллаж байна. Эрдэнэт хот дахь Архангай аймгийн Өндөр-Улаан сумын нутгийн зөвлөлийнхөн малчин түмэндээ туслах хандивын аян өрнүүлж, өвс тэжээл, өмсөх дулаан гутал, хувцаснаас эхлээд хүн, малын хэрэгцээт зүйлсийг цуглуулснаа нутгийн ахан дүүсдээ хүргэхээр Эрдэнэт үйлдвэрийн жолооч нартай хамт замд гарлаа.
Эрдэнэт хот дахь Архангай аймгийн Өндөр-Улаан сумын нутгийн зөвлөлийн дарга, Засвар, механикийн заводын ахмад ажилтан Б.ОТГОНБААТАР:
Бид Эрдэнэт хотод ажиллаж, амьдардаг нутгийн зон олноо хандивт нэгдэхийг уриалсан. Тэгэхдээ зөвхөн мөнгөн тусламж бус хүн, малд хэрэгцээтэй бүхнээр туслах санаачилга гаргаж, өнөөдөр найм дахь өдрөө бид нутгийн зүг хөдөлж байна. Цас зудтай хүнд үед туулах чадвар сайтай машин техникээр тусалж, бидний цуглуулсан өвс тэжээл, бараа бүтээгдэхүүнийг үнэ төлбөргүй хүргэж өгч байгаа, нийгмийн хариуцлагын үлгэр жишээ Эрдэнэт үйлдвэрийн Уурхайчин хамт олондоо баярлалаа. Мөн “Хангайн бүс” худалдааны төвийн хамт олон Архангай аймгийн Эрдэнэмандал, Хайрхан, Өндөр-Улаан сумын малчдад хандив тусламж илгээснийг ачсан. Сайхан сэтгэлээр нэгдэж байгаа хүн бүрд талархсанаа илэрхийлье.
Автотээврийн цехийн Хүнд машин механизмын хэсгийн 5-р хэсгийн жолооч Ч.ГАНБАТ:
Өвөлжилт, хаваржилт хүндэрсэн энэ цаг үед нийгмийн хариуцлагын үйл ажиллагаанд оролцож байгаадаа баяртай байна. Архангай аймгийн Өндөр-Улаан сум, Онгоогийн бригад, Эрдэнэмандал сум гэсэн маршрутаар тусламжийн бараа хүргэх үүрэг даалгавар аваад замдаа гарч байна. Ажлын хамт олон маань осол авааргүй, замдаа сайн явахыг ерөөсөн. Тэнгэр хангай ивээж, алтан шар зам минь өлзийтэй байх болтугай.