“Эрдэнэт үйлдвэр” ТӨҮГ 2024 оны төлөвлөгөөнд зэсийн үнийг Монгол Улсын нэгдсэн төсөвт туссаны дагуу 9000 ам.доллар байхаар тооцож төлөвлөсөн боловч энэ сарын дунджаар 8295 ам.долларын ханштай байлаа. Үүнтэй холбогдуулан зэсийн үнийн бууралтын үед авах арга хэмжээний нөөц төлөвлөгөө боловсруулан ажиллах зайлшгүй шаардлага гарч байгааг удирдах ажилтнуудын шуурхай зөвлөгөөн онцолсон. Зэсийн үнийг одоогоор 8447 ам.доллар байхаар тооцож, үйл ажиллагааны зардлыг 10 орчим хувиар, хөрөнгө оруулалтын 180 тэрбум төгрөгийн ажлыг эрэмбэлж хойшлуулахаар төлөвлөжээ.
Одоогоос жилийн өмнө “Эрдэнэс Монгол” нэгдлийн Төлөөлөн удирдах зөвлөл “Эрдэнэт үйлдвэр” ТӨҮГ-т “Уурхайчин-2” хороололд байр захиалсан ажилчдаа хохиролгүй болгох, үйлдвэрийг эрсдэлгүй болгох, хууль хяналтын байгууллагад хандах үүрэг чиглэл өгсөн. Үүний дагуу Эрдэнэт үйлдвэр орон сууцны “Уурхайчин-2” хороололд байр захиалсан 330 ажилтныхаа хохирлыг бүрэн барагдуулахад 9.6 тэрбум төгрөг зарцуулжээ. Харин одоо үйлдвэрийн газрыг эрсдэлгүй болгох, хууль хяналтын байгууллагад зохих журмын дагуу хандах ажлаа эрчимжүүлэхийг Ерөнхий захирал Хуулийн хэлтэст үүрэг болгов.
Хамтын ажиллагаа, нийгмийн харилцааны бодлогын газрын Нийгмийн харилцааны хэлтсийн дарга Д.Өнөбат орон сууц худалдан авах, өөрийн болон банкны зээлээр, амьдрах орчин нөхцөлөө сайжруулсан ажилчдад олгодог 13 сая төгрөгийн санхүүгийн дэмжлэгт хамруулах ажилтнуудын материалыг ирүүлэхийг бүтцийн нэгжийн удирдлагуудад санууллаа. Өнгөрсөн онд Эрдэнэт үйлдвэр Хамтын гэрээний 7.9 дэх заалтын дагуу 19 бүтцийн нэгжийн 435 ажилтанд орон сууцны санхүүгийн дэмжлэг болох 13 сая төгрөг, нийт 5.6 тэрбум төгрөг олгосон байна.
Эрдэнэт үйлдвэрийн Гэрээт дотоодын цэрэг Засгийн газрын тогтоолоор анги болон өргөжсөнтэй холбоотой бүтэц зохион байгуулалтын өөрчлөлт орж, Зөрчил шалгах, шийдвэрлэх тасаг шинээр байгуулагдсаныг Ангийн захирагч, дэд хурандаа Д.Гантөмөр мэдээллээ. Тус тасаг Улсын онц чухал объектод гарсан таван төрлийн зөрчлийг шалгаж шийдвэрлэх эрх үүрэгтэй ажиллах юм. Тухайлбал, олон нийтийн газар биеэ зүй бусаар авч явах, танхайрах, архидан, согтуурах, тамхины хяналтын тухай хууль зөрчих, төрийн албан тушаалтны шийдвэрийг үл биелүүлэх, үйл ажиллагаанд нь саад учруулах, Дотоодын цэргийн хамгаалалтад байгаа Улсын онц чухал объектод тогтоосон журам зөрчих зэрэг багтана. Өнгөрсөн нэг сарын хугацаанд Эрдэнэт үйлдвэрт олон нийтийн газар биеэ зүй бусаар авч явах гурван зөрчил гарч, торгуулийн арга хэмжээ авагджээ.
Монгол орны нутаг дэвсгэрийн 80 хувь нь цасан бүрхүүлд хучигдсан, зудын байдалтай байгаа энэ үед Эрдэнэт үйлдвэр аймаг, орон нутгийн цасанд хучигдсан зам, давааг нээхэд хүнд машин техникийн туслалцаа үзүүлэх, өвс тэжээл тээвэрлэн хүргэх зориулалтаар туулах чадвар сайтай техник хэрэгслийн туслалцаа үзүүлэх, мөн Уурхайчдын зүгээс малчдад туслах хандивын аян өрнүүлэх уриалга гарган ажиллаж байгаа зэргээр нийгмийн хариуцлагаа хэрэгжүүлэн ажиллаж байна.