Эрдэнэт үйлдвэрийн 2023 оны үйлдвэрлэл, эдийн засгийн үйл ажиллагааны тайлангийн хурал өнөөдөр буюу энэ сарын 29-31-ний өдрүүдэд болж буйг Төлөвлөлт, эдийн засгийн шинжилгээний хэлтсээс мэдээллээ. Өнгөрсөн оны ажлаа хэлэлцэж, дүгнэдэг тайлангийн хурал Ил уурхай, Автотээврийн цех, Баяжуулах үйлдвэр, Геологи хайгуулын экспедиц, Чанарын хяналтын хэлтэс, Тээвэр, ложистикийн төв зэрэг үйлдвэрлэлийн үндсэн цех нэгжүүдээс эхэлж байна. Түүнчлэн, хуваарийн дагуу үйлдвэрийн газрын бүтцийн бүхий л нэгж энэ сарын 30-31-ний өдрүүдэд ажлаа тайлагнаж, өнгөрсөн оны үйл ажиллагаагаа дүгнүүлэх ажээ.
Эрдэнэт үйлдвэрийн худалдан авах ажиллагаанд нэвтрүүлж буй хиймэл оюун ухаан, хүний оролцоогүйгээр хурлын тэмдэглэл болон үнэлгээ хийх, бусад бичиг баримт хөтлөлтөд ашиглах Чимэгэ аппликейшны явцын талаар өнгөрсөн долоо хоногт гүйцэтгэгч компанийн зүгээс танилцуулга хийсэн байна. Үүнтэй холбогдуулан Мэдээллийн технологийн хэлтсийн дарга Б.Гансүх мэдээлэл өглөө. Өнөөдрийн байдлаар, тус системийн угсралт суурилуулалтын ажил хийгдэж байгаа бөгөөд энэ ажлын үр дүнд Чимэгэ систем өмнө нь ашиглагдаж буй аппикейшнээсээ дөрөв дахин хурдан, илүү нарийвчлал бүхий танилттай болох юм байна. Түүнчлэн сул үг буулгахгүй байх, урт яриаг товчлон дүгнэж бичих зэрэг давуу талтай юм. Энэ системийг үйлдвэрийн бүх бүтцийн нэгж, ажилтнууд ашиглах боломжтой болж байгаа юм.
Нийгмийн чиглэлийн бүтцийн нэгжүүд 2024 онд “Соёлтой харилцаа, Чанартай үйлчилгээ” уриан дор ажиллахаар зарлаж буйг Хамтын ажиллагаа, нийгмийн харилцааны бодлогын газрын дарга Ц.Бат-Энх мэдээлсэн. Мөн Эрдэнэт үйлдвэрийн Туулай жилийн алдартнууд, Хөдөлмөрийн аваргуудыг алдаршуулах ёслолын ажиллагаа 02 дугаар сарын 06-ны өдөр А.Амарын талбайгаас эхлэн Соёл, урлагийн цогцолборт зохион байгуулахаар төлөвлөж буйг дуулгалаа. Эрдэнэт үйлдвэрийн хамт олон, цех нэгжээсээ өнгөрсөн оны ажил үйлсээрээ шалгарсан 36 ажилтнаа энэ удаа үйлдвэрийн хэмжээнд төдийгүй олон нийтэд өргөн сурталчилж, өвөрмөц хэлбэрээр алдаршуулахаар бэлтгэж байна.