“Эрдэнэт үйлдвэр” ТӨҮГ-ын Хамтын ажиллагаа, нийгмийн харилцааны бодлогын газраас санаачлан 2024 оныг “Соёлтой харилцаа, чанартай үйлчилгээ” уриан дор “Хүний эрхийг дээдлэн, нийгмийн харилцааг төгөлдөржүүлж, үйлчилгээний чанарыг дээшлүүлэх жил” болгон зарлаж байна.
Энэ хүрээнд тус үйлдвэрийн дэргэдэх нийгмийн чиглэлийн бүтцийн нэгж, цех хэлтэс нэгдэж, үйлдвэрийн газрын нийгмийн хариуцлагыг дээшлүүлэхэд хамтарч ажиллах юм. Өөрөөр хэлбэл, нийгмийн цехүүд үйл ажиллагааныхаа бүх шатанд соёлтой харилцааг хэвшүүлэх, үйлчилгээний чанарыг дээшлүүлэх, өөрийн онцлогт тохирсон “Соёлтой харилцаа, чанартай үйлчилгээ” дэд төсөл, хөтөлбөр боловсруулан, Чанарын удирдлагын тогтолцооны стандартын шаардлагыг хангах, “Чанар-бүтээмж-үр ашиг” ойлголтыг ажилтан бүр мөрдлөг болгох, үйлчилгээний ажилтнуудыг сургах, дадлагажуулах, техник, тоног төхөөрөмжийн хэвийн найдвартай ажиллагааг хангах, орчин үеийн үйлчилгээний шаардлагад нийцсэн техник, технологийг нэвтрүүлэх боломжийг судлах, хөрөнгө оруулалтын төлөвлөгөөнд тусгах зэрэг ажлыг үйлдвэрлэлийн цехүүдийн дэмжлэг, хамтын оролцоотойгоор зохион байгуулна.
Түүнчлэн, хэрэглэгчийн хэрэгцээ, шаардлагыг тодорхойлсон судалгааг тогтмол явуулах, хэрэглэгчийн сэтгэл ханамжийн судалгаагаар үйлчилгээний чанарыг үнэлэх, үйлдвэрийн газрын үнэт зүйлст тусгагдсан ёс зүйн хүрээнд хариуцлага, хяналтын систем бий болгох, хүний эрхийн магадлан шинжилгээ хийлгэх зэрэг олон хэлбэрийн бодлого, хөтөлбөрийг “Соёлтой харилцаа, чанартай үйлчилгээ” уриан дор хэрэгжүүлэх юм. Нийгмийн хариуцлагын бодлогоо чухалчилдаг Эрдэнэт үйлдвэрийн хувьд энэхүү санаачилга цаг үеэ олсон төдийгүй үр дүнд нь нийгмийн үйлчилгээний чанар сайжрахын зэрэгцээ ажилтнуудын хөдөлмөрийн бүтээмж дээшлэн, энэ чиглэлийн бүтцийн нэгжүүдийн орлого нэмэгдэж, өрсөлдөх чадвар дээшлэхэд өндөр ач холбогдолтой.