Өөрөө нунтаглах хэсгийн дөрөвдүгээр секцийн хүчин чадлыг хоёр сая тонноор нэмэгдүүлнэ

“Эрдэнэт үйлдвэр” ТӨҮГ-ыг 2031 он хүртэл хөгжүүлэх үндсэн чиглэлд тусгагдсан Баяжуулах үйлдвэрийн хүчин чадлыг 40 сая тоннд хүргэх өргөтгөл шинэчлэлийн ажил энэ онд эхлэхээр бэлтгэл хангаж байна. 
46 дахь жилдээ хүдэр олборлож буй Эрдэнэтийн-Овоо ордын ил уурхай гүнзгийрэхийн хэрээр уул геологийн нөхцөл хүндэрч, хүдэр дэх зэсийн агуулга буурч, хүдрийн хатуулаг өсөж байгаа. Үүнтэй холбоотойгоор Эрдэнэт үйлдвэрийн эцсийн бүтээгдэхүүний гарц, борлуулалтын орлого буурах эрсдэлтэй нөхцөл байдал үүсэж байгаа юм. Эрсдэлийн эсрэг авч буй арга хэмжээ нь үйлдвэрлэлийн хүчин чадлыг нэмэгдүүлж, бүтээгдэхүүний өсөлт бий болгох. 
Энэ зорилтын хүрээнд Эрдэнэт үйлдвэр техник, технологийн шинэчлэл, өргөтгөлийн ажлыг үе шаттай, амжилттай хэрэгжүүлсээр байгаагийн нэг нь Өөрөө нунтаглах хэсгийн дөрөвдүгээр секцийг хоёр сая тонноор нэмэгдүүлэх өргөтгөл юм. Өнгөрсөн оноос төлөвлөлт, худалдан авалт, зохион байгуулалт нь эхэлсэн энэхүү өргөтгөл шинэчлэлийн үндсэн тоног төхөөрөмжүүд Финлянд, Швейцар зэрэг улсад үйлдвэрлэгдэн, Монгол руу ачигджээ. 
Үйлдвэрлэлийн үндсэн тоног төхөөрөмжүүдийн тээвэрлэлтийн хугацаанд хийгдэх суурийн бэлтгэл, угсралтын ажил газар дээрээ эхэллээ. Тоног төхөөрөмжийн нийлүүлэлттэй холбоотой хүндрэл гарахгүй бол төлөвлөсөн хугацаанаас өмнө зургадугаар сард ашиглалтад оруулахаар шамдаж байна, гэж Баяжуулах үйлдвэрийн Ерөнхий инженер Г.Цогтгэрэл ярив. 
Энэхүү бүтээн байгуулалт, өргөтгөл шинэчлэлийн ажил амжилттай хийгдсэнээр Баяжуулах үйлдвэрийн суурилагдсан хүчин чадал 40 сая тоннд хүрэх нөхцөл бүрдэх юм.