Эрдэнэт үйлдвэрийн удирдах ажилтнуудын даваа гарагийн ээлжит шуурхай зөвлөгөөнийг Үйлдвэрлэлийн хэлтсийн дарга Т.Түмэн-Өлзий удирдлаа. Шуурхайн эхэнд Дотоодын цэргийн 816 дугаар ангийн захирагчаар цагдаагийн дэд хурандаа Д.Гантөмөр томилогдсоныг танилцуулж, шинэ ажилд нь амжилт хүсэв.
Орхон аймгийн Засаг даргын 2024 оны 01 дүгээр сарын 17-ны өдрийн захирамжийн дагуу цагаан тоосны бүсэд амьдарч буй иргэдэд эрүүл мэндийн үзлэг оношилгоо зохион байгуулах ажлын хэсэг хуралдсан байна. Хурлаар дээрх иргэдийн эрүүл мэндийн үзлэг оношилгоог ирэх 02 дугаар сарын 01-нээс эхлүүлэхээр Эрдэнэт үйлдвэр, Орхон аймгийн ЗДТГ болон Эрүүл мэндийн газрын мэргэжилтнүүд харилцан санал солилцож, шийдвэрлэсэн тухай Байгаль орчин, ногоон хөгжлийн хэлтсийн дарга Ж.Жавхланбат мэдээллээ.
Шинэ оны эхний 20 хоногийн байдлаар, уурхайчид үйлдвэрлэлийн төлөвлөгөөг бүх үзүүлэлтээр биелүүлэн ажиллаж байна. Уулын цул гаргалт 105 хувь, хөрс хуулалт 109 хувь, хүдэр олборлолт 101 хувиар тус тус биелжээ. Энэ хугацаанд 2 сая 80.8 мянган тонн хүдэр боловсруулж, төлөвлөгөөг 101.7 хувиар биелүүлээд байна. Түүнчлэн, хүдэр дэх зэсийн агуулга 0.380 хувь, молибдены агуулга 0.0152 хувь, зэсийн металл авалт 88.90 хувь, молибдены металл авалт 63.50 хувьтай буюу эдгээр үзүүлэлтүүд 101-130 хувиар биеллээ. Сарын эхний 20 хоногт нийт 30766 тонн зэсийн баяжмал экспортод ачуулсан байна. Ачигдсан зэсийн баяжмалын чанар 22.33 хувь, молибдены баяжмалын чанар 50.54 хувьд хүрч, төлөвлөгөө 101.5-105.3 хувиар биелээд байгааг Үйлдвэрлэлийн хэлтсээс мэдээллээ.
Авилгаас урьдчилан сэргийлэх, соён гэгээрүүлэх чиглэлээр 2024 онд хийж хэрэгжүүлэх ажлын төлөвлөгөө батлагдсан байна. Энэхүү төлөвлөгөөг хэрэгжүүлж, үйл ажиллагаандаа мөрдөж ажиллахыг Хүний нөөц, захиргааны хэлтсийн дарга О.Отгонбаяр бүтцийн нэгжийн удирдлагуудад анхаарууллаа. Мөн Ерөнхий захирлын тушаалын дагуу ажлын байранд тавигдах шаардлагад дүн шинжилгээ хийх дэд ажлын хэсэг ажилласан байна. Эрдэнэт үйлдвэрийн нийт 7000 ажилтны ажлын байранд ажлын байрны тодорхойлолт нь нийцэж байгаа эсэхэд дүн шинжилгээ хийх ажил өнөөдрийн байдлаар 70.6 хувийн гүйцэтгэлтэй үргэлжилж буйг мэдээлэлдээ онцлов.
Монгол Улсын Засгийн газраас 2024 оны бүсчилсэн хөгжлийн жил болгон зарласантай холбогдуулан хойд бүсийн хөгжлийн төлөвлөгөө боловсруулж эхлээд байна. Хойд бүсийн төв нь Орхон аймаг, тэр дундаа Эрдэнэт үйлдвэрийг түшиглэн байгуулж буй Үйлдвэрлэл, технологийн парк байхаар төлөвлөгөөнд тусгана. Өөрөөр хэлбэл, хойд бүсэд хамаарагдах гурван аймгийн ирээдүйд чиглэсэн хөгжлийн хөтөлбөрүүдийн гол цөм нь Эрдэнэт гэж үзэж төлөвлөгөө боловсруулж байгаа аж. Тиймээс энэ асуудалд Эрдэнэт үйлдвэрийг 2031 он хүртэл хөгжүүлэх хөгжлийн үндсэн чиглэлд тусгагдсан төсөл хөтөлбөрүүд багтах тул бүтцийн нэгжийн удирдлага, мэргэжилтнүүд онцгой анхаарч, өндөр идэвх оролцоотой ажиллахыг Ерөнхий захирал шуурхай зөвлөгөөнд хийсэн мэдээлэлдээ дурдлаа.