ШУТИС-ийн харьяа, “Эрдэнэт үйлдвэр” ТӨҮГ-ын дэргэдэх “Эрдэнэт цогцолбор” дээд сургуулийн 2023-2024 оны хичээлийн жилийн намрын улирлын 25 дахь төгсөлтийн “Эрдмийн баяр” өнөөдөр боллоо. Энэ үеэр “Эрдэнэт үйлдвэр” ТӨҮГ-ын Ерөнхий захирал, Геологи-минералогийн ухааны доктор (Ph.D) Г.Ёндон төгсөгчдөд мэндчилгээ дэвшүүлж, Цахилгаан системийн автоматжуулалт мэргэжлээр 3,72 үнэлгээний голч дүнтэй, ШУТИС-ийн Шилдэг төгсөгч Т.Абылайд Эрдэнэт үйлдвэрт ажиллах эрхийн батламж гардуулав. Мөн түүнд ШУТИС-ийн шилдэг төгсөгчийн батламж, дурсгалын зүйл хадгалуулсан юм.
“Эрдмийн баяр” төгсөлтийн үйл ажиллагаанд “Эрдэнэт үйлдвэр” ТӨҮГ-ын Хүний нөөц, захиргааны хэлтсийн дарга, Бизнесийн удирдлагын ухааны доктор (Ph.D) О.Отгонбаяр, Хамтын ажиллагаа, нийгмийн харилцааны бодлогын газрын албаны дарга Д.Өнөбат, Орхон аймгийн ЗДТГ-ын Нийгмийн бодлогын хэлтсийн дарга А.Бумансор, Захирагчийн албаны дарга Б.Одгэрэл болон Эрдмийн зөвлөлийн гишүүд, эрдэмтэн багш нар, эцэг эхийн төлөөлөл оролцов. Баярын үйл ажиллагааг нээж, тус сургуулийн захирал, доктор (Ph.D) Д.Зоригтхүү үг хэлэхдээ, манай сургууль 2023 оны 05 дугаар сард Кембрижийн олон улсын сургуулиар бүртгэгдэж, Кембрижийн хөтөлбөрөөр сургалт явуулах тусгай зөвшөөрлийг албан ёсоор авсан. Мөн сард Японы Коосэн хөтөлбөрөөр сургалт явуулах эрх авч, механик, цахилгаан, химийн инженерчлэл гурван хөтөлбөрөөр анхны элсэлтээ авсныг онцлоод, олон улсын хөтөлбөрөөр сургалт явуулах эрх авах, бакалаврын сургалтын 2 хөтөлбөрөө магадлан итгэмжлүүлэхэд хүчин чармайлт гарган ажилласан багш, ажилчид, бодлогын болон санхүүгийн дэмжлэг үзүүлж ирсэн үйлдвэрийн удирдлагуудад талархал илэрхийллээ.
Энэ хичээлийн жилийн намрын улиралд ШУТИС болон МУИС-ийг магистрын есөн хөтөлбөрөөр 39, бакалаврын долоон хөтөлбөрөөр 36 төгсөгч ийнхүү “Эрдмийн баяр”-аа тэмдэглэж, дипломоо гардлаа.
Нар минутад мандаж минутад жаргана.
Үс засуулвал: 
Суудал: 
