“Эрдэнэт үйлдвэр” ТӨҮГ-ын Спорт цогцолбороос өнгөрсөн онд нийт ажилтнуудын дунд зохион байгуулсан ажлын байрны дасгал, зуны 43-р, өвлийн 14-р спартакиадын шилдгүүддээ шагнал гардуулах ёслол өнөөдөр Ерөнхий захиргааны 2-р байрны “Оюу” танхимд боллоо. Энэхүү үйл ажиллагаанд үйлдвэрийн удирдлагууд, спортын үйл ажиллагаанд хамт олноо манлайлсан шилдэг цехүүдийн удирдлага, арга зүйчид, тамирчид хүрэлцэн ирсэн.
“Эрдэнэт үйлдвэр” ТӨҮГ-ын Ерөнхий захирал Г.Ёндон ёслолын ажиллагааг нээж хэлсэн үгэндээ: “Манай үйлдвэр түүхэн тэгш ой давхацсан 2023 оныг ажлын өндөр амжилтаар үдсэн. Эрдэнэт үйлдвэр түүхэндээ анх удаа 39 сая гаруй тонн хүдэр олборлож, 37 сая гаруй тонн хүдэр боловсруулж, 600 мянган тонн зэсийн баяжмал, 6000 тонн молибдены баяжмал экспортод гаргаж, Улсын төсөвт татвар хураамж, ноогдол ашиг хэлбэрээр 2 их наяд гаруй төгрөг төвлөрүүлсэн. Энэ бүхнээс үзэхэд бидний хувьд 2023 он арвин их “ургацтай” жил байлаа. Уурхайчид маань эрүүл байж, энэ их амжилтыг бүтээдэг. Уурхайчны хөдөлмөр хүнд. Иймээс бид эрүүл бие, саруул ухаантай байхын тулд спортоор хичээллэх хэрэгтэй. Үйлдвэртэйгээ зэрэгцэн байгуулагдсан Спорт цогцолбор энэ чиглэлд олон талт үйл ажиллагаа явуулдаг. Тэдгээрийн нэг нь уламжлал болгон зохион байгуулдаг спартакиад. Спартакиадын шилдэг тамирчид, хамт олондоо баяр хүргэе. Нийт ажилтнууддаа спортоор хичээллэхийг уриалж, эрүүл энхийг ерөөе” гэв.
“Эрдэнэт үйлдвэр” ТӨҮГ-ын удирдлагууд спортын шилдгүүддээ үүрд хадгалагдах цом, өргөмжлөл гардуулав.
“Эрдэнэт үйлдвэр” ТӨҮГ-ын өвлийн 14-р спартакиад 2023 оны турш спортын зургаан төрлөөр явагдсанаас нийлбэр дүнгээр үйлдвэрлэлийн үндсэн цехүүдээс Засвар, механикийн заводын хамт олон тэргүүлж, Баяжуулах үйлдвэрийнхэн дэд байр, Ил уурхайн хамт олон гутгаар байр эзэлжээ. Туслах цехүүдээс Гэрээт цагдаагийн хэлтэс, Орос цэцэрлэгийн хамтарсан баг тэргүүн байр эзэлсэн бол, Геологи, хайгуулын экспедицийнхэн дэд байрт, Гэрээт гал түймэр унтраах, аврах 58-р ангийн хамт олон гутгаар байрт шалгарсан байна.
“Эрдэнэт үйлдвэр” ТӨҮГ-ын 43-р спартакиад 2023 оны турш 19 төрлөөр зохион байгуулагдсанаас үйлдвэрлэлийн үндсэн цехээс Баяжуулах үйлдвэрийнхэн тэргүүн байрт шалгарч, Засвар, механикийн заводын хамт олон дэд, Ил уурхайнхан удаах байр эзэлжээ. Туслах цехүүдээс Гэрээт цагдаагийн хэлтэс, Орос цэцэрлэгийн хамтарсан баг түрүүлж, Цахилгаан цехийн баг дэд байр, “Эрдэнэт Медикал” эмнэлгийнхэн гутгаар байрт шалгарсан байна.
2023 оны өвлийн спортын шилдэг тамирчнаар Баяжуулах үйлдвэрийн ажилтан Б.Отгончимэг, Дулааны цахилгаан станцын ажилтан О.Очирбат, Засвар, механикийн заводын ажилтан Р.Түвшинбаяр нар шалгарчээ.
Мөн ажлын байрны дасгалыг хэвшүүлэхэд хамт олноо манлайлан зохион байгуулсан шилдэг арга зүйчээр Баяжуулах үйлдвэрийн П.Мягмарсүрэн, Геологи, хайгуулын экспедицийн Э.Төрхүү нар шалгарчээ.
Шагнал гардуулах ёслолын төгсгөлд Хамтын ажиллагаа, нийгмийн харилцааны газрын дарга Ц.Бат-Энх хэлсэн үгэндээ: “Уламжлал болсон спартакиад маань амжилттай явагдсан. Ирэх жилээс бид спортын үйл ажиллагааг шинэлэг хэлбэрээр зохион байгуулна. Тухайлбал, спартакиадыг жилийн туршид бус, 10-14 хоногт багтаан спортын тодорхой төрлүүдээр олныг хамруулан, нийтийн хүртээл болгон зохион байгуулахаар төлөвлөж, бэлтгэл ажилдаа ороод байгаа” гэж онцолсон юм.
Спорт цогцолбор өнгөрсөн онд 43-р спартакиадыг зуны 19 төрлөөр зохион байгуулсан бөгөөд нийт 3181 ажилтан хамрагджээ. Өвлийн спартакиадыг 5 төрлөөр зохион байгуулж, 924 ажилтан оролцож, хурд хүч, авхаалж самбаагаа сорьсон байна.