Эрдэнэт үйлдвэрийн нийгмийн чиглэлийн цехүүд энэ онд “Соёлтой харилцаа - Чанартай үйлчилгээ” уриан дор нэгдсэн зорилт дэвшүүлж байна. Өөрөөр хэлбэл, өөр өөрсдийн үйл ажиллагааны онцлогт нийцүүлэн бүтээгдэхүүн үйлчилгээний нэр төрөл, ашиг орлого нэмэгдүүлэх, өртөг зардлыг бууруулан, хэмнэлт гаргаж ажиллах төлөвлөгөө боловсруулж, үйл ажиллагаагаа шинэ шатанд гаргахыг зорино. Энэ зорилтыг өнөөдөр эхэлсэн нийгмийн цехүүдийн тайлангийн хурлаар онцлон тодорхойллоо.
Тайлангийн хурлыг үйлдвэрийн Хамтын ажиллагаа, нийгмийн харилцааны бодлогын газрын дарга Ц.Бат-Энх удирдаж, тус газрын албаны дарга Д.Өнөбат, албаны дарга Д.Эрдэнэбат болон холбогдох мэргэжилтнүүд байлцан, нийгмийн цехүүдийн бодлого зорилтыг хэлэлцэв. Эрдэнэт үйлдвэрийн Хамтын ажиллагаа, нийгмийн харилцааны бодлогын газрын харьяанд боловсрол, эрүүл мэнд, соёл спорт, амрал аялал жуулчлал зэрэг нийгмийн чиглэлийн 11 бүтцийн нэгж, цехүүд ажилладаг.
Өнөөдөр Аж ахуй, үйлчилгээний цех, “Сэлэнгэ” амралт, аялал жуулчлалын цогцолбор 2023 оны ажлаа тайлагнаж, шинэ оны зорилтоо танилцууллаа. 2023 онд Эрдэнэт үйлдвэрийн Аж ахуй, үйлчилгээний цех анх удаа нийтлэг үйлчилгээний ажилтнуудын улсын хэмжээний зөвлөгөөн зохион байгуулсан бол “Сэлэнгэ” амралт, аялал жуулчлалын цогцолбороос “Сайн байна уу, Эрдэнэт” танин мэдэхүйн тойрон аяллыг санаачлан эхлүүлсэн байна. Шинэ онд “Сайн байна уу, Эрдэнэт” тойрон аялал улам өргөжиж, эх орны өнцөг булан бүрээс аялагч амрагчид хүлээж авах зорилт дэвшүүлжээ. Нийгмийн цехүүдийн тайлангийн хурал үргэлжилж байгаа бөгөөд хийж, хэрэгжүүлсэн ажлын талаар цуврал мэдээлэл хүргэнэ.