Эрдэнэт үйлдвэрийн ажилтнуудын 2024 оны эрүүл мэндийн урьдчилан сэргийлэх үзлэг ирэх 3 сарын 1-нээс эхлэхээр товлогдсон тухай даваа гаригийн ээлжит шуурхай зөвлөгөөнд Хамтын ажиллагаа, нийгмийн харилцааны газрын дарга Ц.Бат-Энх мэдээллээ. Өнгөрсөн оны эрүүл мэндийн үзлэгийг 2023 оны 4-12 сарын хооронд зохион байгуулж, нийт 8569 хүн хамрагдсан байна. Энэ нь хамрах хүрээ, оролцооны хувьд өндөр үзүүлэлт бөгөөд ажилчдынхаа эрүүл мэндийн үзлэгт үйлдвэрийн газраас 7.5 тэрбум төгрөг зарцуулжээ. Өмнөх жилүүдэд урьдчилан сэргийлэх үзлэг он дамжиж, дараа оны 5 сар хүртэл сунжрах тохиолдол гарч байсныг цэгцэлж, тухайн онд нь багтаан зохион байгуулах чиглэл барьж ажиллаж буйг мөн онцлов. Энэ жилийн эрүүл мэндийн үзлэг эхлэхээс өмнө Эрдэнэт үйлдвэр төсөв зардлыг гаргаж, цагаан тоосны нөлөөллийн бүс нутаг болон бусад шалтгаанаар холбоотой 2301 хүнийг урьдчилан сэргийлэх үзлэг, оношилгоонд хамруулах юм байна.
Үйлдвэрлэлийн тоног төхөөрөмжийн найдвартай үйл ажиллагааг хангаж ажиллах зорилтын хүрээнд машин техник, сэлбэг хэрэгслийн бүрэн бүтэн аюулгүй байдалд онцгой анхаарч ажиллахыг Механикийн хэлтсийн дарга Б.Чинзориг мэдээлэлдээ онцоллоо. Тэрээр, баталгаат хугацаа дуусахаас өмнө нийлүүлэгч компаниудад хандаж, засвар үйлчилгээ, зөвлөмж заавар авах ажлыг шуурхай зохион байгуулж байхыг цех нэгжийн удирдлагуудад анхааруулав. Мөн эвдрэл гэмтэл гарсан тохиолдолд холбогдох баримт бичгийг цаг алдалгүй бүрдүүлж, засварын баталгаат хугацаанд нь нийлүүлэгч компаниудиар үүрэг хариуцлагаа хангахад нь шаардлага тавьж ажиллаарай гэв.
Өргөтгөсөн шуурхайн төгсгөлд Ерөнхий захирал Г.Ёндон, ХАБЭА-н чиглэлийн бүх ажлыг нэн түрүүнд чухалчилж, онцгой анхаарч ажиллах шаардлагатайг анхааруулав. Хөдөлмөрийн хамгаалах хэрэгсэл, ажлын хувцасны чанар, хүртээмжийн талаар судалгаа хийж, уурхайчдын санал бодлыг нь сонсож, шийдвэрлэж ажиллахыг онцоллоо.