Хариуцлагатай уул уурхайн түүчээлэгч Эрдэнэт үйлдвэр ажлын байрны аюулгүй байдлыг эрхэмлэж, “Нэн түрүүнд - Хөдөлмөрийн эрүүл мэнд, аюулгүй байдал” уриатай ажилладаг. Тиймээс жил бүрийн эхэнд аюулгүй ажлын байр, эрүүл ахуйн чиглэлээрх ажлаа дүгнэж, цаашид хийх зорилго, зорилтоо тодорхойлж хэвшсэн юм. Энэ дагуу 2024 онд авч хэрэгжүүлэх төлөвлөлт, бодлогоо “Нэн түрүүнд- Хөдөлмөрийн эрүүл мэнд, аюулгүй байдал ба Манлайлал, оролцоо” сэдвийн дор хэлэлцэхийн зэрэгцээ өнгөрсөн оны ажилдаа үнэлэлт дүгнэлт өглөө.
2023 онд үйлдвэрийн ХАБЭА-н хэлтсээс үндсэн таван зорилт дэвшүүлэн хэрэгжүүлжээ. Тухайлбал, ажилтны ХЭМАБ - Манлайлал, оролцоог нэмэгдүүлэх, хөдөлмөрийн хамгаалах хэрэгсэл, хор саармагжуулах бодис, хүнсний бүтээгдэхүүнийг цаг тухайд нь олгох, шийдвэрлэх, чадамжид суурилсан ХЭМАБ-ын виртуал сургалтын орчныг бүрдүүлэх, ажлын байран дахь гар утасны зохистой хэрэглээний талаар нөлөөллийн арга хэмжээ авч хэрэгжүүлэх, ажлын байрны хөдөлмөрийн нөхцөлийн үнэлгээг үндэслэн ажил, мэргэшлийн нэршлийг Хөдөлмөр, нийгмийн хамгааллын сайдын тушаалын дагуу ажил, мэргэжлийн нэршилтэй нийцүүлэх ажлыг ажлын байранд зохион байгуулах зэрэг үндсэн таван чиглэлээр зорилтоо биелүүлж ажилласан байна. Энэ тухай дэлгэрэнгүй илтгэлийг “Эрдэнэт үйлдвэр” ТӨҮГ-ын ХАБЭА-н хэлтсийн дарга Д.Мөнхболд танилцууллаа.
Түүнчлэн, эрүүл мэндийн чиглэлээр хийгдсэн ажлууд, анхан шатны удирдах ажилтнуудын ХАБЭА-н модуль сургалтын үр дүн, ХАБЭА-н зөвлөлийн үйл ажиллагааны талаар “Эрдэнэт” сувиллын цогцолборын дарга Б.Бат-Эрдэнэ, “Эрдэнэт цогцолбор” дээд сургуулийн захирал Д.Зоригтхүү, Тээвэр, ложистикийн төвийн мастер Д.Гантулга нарын илтгэлтэй танилцаж, 2024 онд хэрэгжүүлэх зорилт хөтөлбөрийг хэлэлцэв.
Бага хурлаар ХЭМАБ-ын манлайлал, оролцоог шинэ түвшинд гаргах, илүү сайжруулахын тулд 2024 онд таван чиглэлд зорилтоо тодорхойллоо. Эрүүл ажилтан, Манлайлал-Оролцоо, Төв удирдлага, Аюулгүй ажиллагч, Аюулгүй техник, технологи гэсэн таван чиглэл 2024 оны “Нэн түрүүнд-ХАМАБ” уриан дор хэрэгжих юм байна. Бага хурлын төгсгөлд Ерөнхий захирал Г.Ёндон хуралд оролцогчид болон нийт ХАБЭА-н ажилтан, мэргэжилтнүүддээ хандан, уул уурхай хариуцлагатай, амжилттай ажиллах үндэс нь үйлдвэрлэлийн аюулгүй ажиллагаа, ажилтны эрүүл мэнд гэдгийг онцлон сануулж, шинэ онд хэрэгжүүлэх бодлого, ажилд өндөр амжилт хүслээ.