ХӨРӨНГӨ ОРУУЛАЛТЫН ЗАРДЛЫН ХЭМНЭЛТИЙГ ХҮДЭР БЭЛТГЭЛИЙН НЭГДҮГЭЭР ШУГАМЫН ШИНЭЧЛЭЛД ЗОРИУЛНА

Эрдэнэт үйлдвэр 2023 оны хөрөнгө оруулалтын төлөвлөгөөт ажлын зардлаас 109.2 тэрбум төгрөгийн хэмнэлт гарган ажилласныг “Эрдэнэс Монгол” нэгдлийн ТУЗ-өөс өндрөөр үнэлсэн юм. Олон улсын хөндлөнгийн аудитын “KPMG AUDIT” ХХК-иас ирүүлсэн хараат бус дүгнэлт, холбогдох судалгаа тооцооллыг үндэслэн, хөрөнгө оруулалтын ажилд хамтарсан 20-иод компанитай хэлцэл хийсний үр дүнд үнийн өсөлтөөс хэмнэлт гаргажээ. 
Хөрөнгө оруулалт, бүтээн байгуулалтын зардлаас хэмнэсэн 109.2 тэрбум төгрөгийг Баяжуулах үйлдвэрийн хүдэр бэлтгэлийн нэгдүгээр шугамыг шинэчлэх бүтээн байгуулалтад зарцуулахаар үйлдвэрийн удирдлагууд шийдвэрлээд байна. 
45 жил олборлосон Эрдэнэтийн-Овоо орд гүнзгийрэхийн хэрээр хүдрийн хатуулаг нэмэгдэж, хүдэр дэх металлын агууламж буурч байна. Үүнээс үүдэлтэйгээр бүтээмжийг нэмэгдүүлэх, баяжмалын гарцыг хүрсэн түвшинд барих, хүдрийн хатуулагтай холбоотой өсөж буй ашиглалтын зардлыг бууруулах, ашигт ажиллагааны түвшинг нэмэгдүүлэх зорилгоор олон ажил төлөвлөн хэрэгжүүлж байгаагийн нэг нь хүдэр бэлтгэлийн нэгдүгээр шугамын шинэчлэл юм. Уг ажилд Монголын “Соёолон интернэшнл” ХХК, Австралийн DRA, “ATC Williams” зэрэг олон улсад нэр хүндтэй компаниуд оролцож байна. 
“Эрдэнэт үйлдвэр” ТӨҮГ хамтран ажиллагч компаниудтай амжилттай хэлцэл хийж, үнийн өсөлтөөс 109.2 тэрбум төгрөгийн хэмнэлт гаргаснаа үйлдвэрлэлийн өргөтгөл шинэчлэлийн ажилдаа зарцуулж, үр дүнтэй ажиллаж байна.