“Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн шинэчилсэн найруулга ба анхаарах асуудал” сэдэвт сургалт, зөвлөгөөн өнөөдөр Эрдэнэт үйлдвэр дээр эхэллээ. Өнгөрсөн оны 6 дугаар сард УИХ-аас хэлэлцэн баталсан тус хуулийн шинэчлэгдсэн зүйл, заалтуудын талаар ойлголт, мэдлэг өгөх зорилгоор Монгол Улсын Сангийн яам болон Худалдан авах ажиллагааны боловсролын төв хамтран эл сургалтыг зохион байгуулж байна.
Сургалтад “Эрдэнэт үйлдвэр” ТӨҮГ-ын удирдах албан тушаалтан, хууль, дотоод хяналт, санхүү, эдийн засаг, үйлдвэрлэл, нийгэм, худалдан авах ажиллагаа хариуцсан бүтцийн нэгжийн ажилтнууд, үйлдвэрийн харьяа “Эрдэнэт Медикал” эмнэлгийн холбогдох албан тушаалтан болон Орхон аймгийн Худалдан авах ажиллагааны газрын ажилтан, мэргэжилтнүүд өргөн бүрэлдэхүүнтэй оролцлоо.
Сургалтыг тус хуулийн шинэчилсэн найруулга болон холбогдох эрх зүйн баримт бичиг боловсруулах ажлын хэсгийн гишүүн Сангийн яамны Хууль, эрх зүйн газрын Худалдан авах ажиллагааны хэлтсийн дотоодын зөвлөх Д.Номингэрэл, хэлтсийн мэргэжилтэн Д.Гантулга нар удирдан, Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн танилцуулга, үйлчлэх хүрээ, нэр томьёоны тодорхойлолт, тендер шалгаруулалт зохион байгуулах, тендер илгээх, худалдан авах ажиллагааг төлөвлөх, зохион байгуулах, тайлагнах, захиалагч, үнэлгээний хорооны чиг үүрэг, шийдвэр гаргахад анхаарах хүчин зүйл, гэрээний үүргийн гүйцэтгэл, тендер шалгаруулалт зохион байгуулахад анхаарах асуудал зэрэг хуульд тусгагдсан бүхий л сэдвээр сургалт мэдээлэл өглөө.
Худалдан авах ажиллагаа, тендер шалгаруулалттай холбоотой хууль тогтоомжийг хэрэгжүүлэхэд тулгардаг хүндрэл, бэрхшээлийг тодруулах, нэгдсэн тодорхой ойлголттой болох боломж бүрдүүлэхэд сургалтын ач холбогдол оршиж буйг зохион байгуулагчид онцлов.