Энэ онд Эрдэнэт үйлдвэрийн уурхайчид 38 сая тонн хүдэр боловсруулахаар зорьж, төслийн бүрэн хүчин чадалд хүргэх төлөвлөгөөтэй ажиллаж байна. Мөн Баяжуулах үйлдвэрийн Өөрөө нунтаглах хэсэгт 2 сая тонноор хүчин чадлаа нэмэгдүүлэх өргөтгөлийг ашиглалтад оруулна. Хүдрийн агуулгын бууралтын эсрэг хүчин чадлаа өсгөх ажлыг шат дараатай хийж, ирэх жил хүдэр боловсруулалтын хэмжээг 40 сая тоннд хүргэх үндсэн гол зорилт дэвшүүлээд байна. Үүнтэй холбоотой техник, эдийн засгийн үзүүлэлт боловсруулах зэрэг ажилд үйлдвэрлэлийн үндсэн цех нэгж, геологи, уурхайн мэргэжилтнүүд өндөр идэвх оролцоотой, санаачилгатай ажиллахыг онцлов.
Түүнчлэн 2024 онд хүний нөөц, ажлын байрны чиглэлээр орон тоог шинээр нэмэхгүй байх бодлого баримтлан ажиллана. Өндөр насны тэтгэвэрт суух болон өөрийн хүсэлтээр ажлаа өгсөн ажилтнуудын ажлын байранд, түүнчлэн шинээр бий болж буй хэсэг нэгж дээр дотроо ажиллаж байгаа ажилтнуудаас шилжүүлэн ажиллуулах чиглэл барина гэдгийг Ерөнхий захирал Г.Ёндон шинэ оны анхны шуурхай зөвлөгөөнд мэдээллээ. Түүнчлэн, гадаад зах зээл дээрх зэсийн үнэ ханшийн хэлбэлзэл, бууралтаас шалтгаалсан “Хямралын эсрэг авах” арга хэмжээний төлөвлөгөө боловсруулан, үүнтэй уялдуулан үйл ажиллагаа, хөрөнгө оруулалтын эрэмбэ, бодлогоо тодорхойлон ажиллахыг үйлдвэрийн бүхий л бүтцийн цех, нэгжүүдэд сануулж, үүрэг чиглэл болголоо.
Ерөнхий инженер Т.Батмөнх хийсэн мэдээлэлдээ шинэ оны зорилтот ажлуудаа сар, улирлаар төлөвлөн хэрэгжүүлж эхэлснийг мэдээлэв. Тэрээр, “Он гарсаар үйлдвэрлэлийн төлөвлөгөө биелж байна. 2024 онд гурван том зорилт дэвшүүлж буйгийн эхнийх нь үйлдвэрлэлийн үндсэн тоног төхөөрөмжийн найдвартай ажиллагааг хангах. Үүнд, үндсэн тоног төхөөрөмжийн сэлбэг хэрэгсэл, эд ангийн хангамж, нийлүүлэлтийн хугацааг урьдчилан нарийн төлөвлөж, онцгой анхаарч ажиллах шаардлагатай. Энэ оны үйлдвэрлэлийн бүхий л үйл ажиллагаа үүнээс шалтгаалах тул оны эхний шуурхайд тусгайлан анхааруулж байна” гэж онцлов.
Хаягдлын аж ахуй дахь цагаан тоосны дэгдэлтийг бууруулах, шинэ хаягдлын аж ахуй байгуулах газар нутгийн асуудлаар Орхон аймгийн Засаг даргын зөвлөлийн хуралдаанд танилцууллаа. Геологи маркшейдерийн хэлтэс, Ерөнхий геологич нар энэ чиглэлд мэргэжлийн хяналт тавьж ажиллахыг анхааруулав. Мөн нийлүүлэгдэж буй тоног төхөөрөмжийн чанар, үйлдвэрлэлийн үйл явцад шууд нөлөөлдөг учир үүнд хяналтын тодорхой тогтолцоо бий болгож, хэрэгжилтийг нийлүүлэгч талууд хангаж байхаар үүрэгжүүлэх нь энэ онд хийгдэх чухал ажил болно гэв.
Нар минутад мандаж минутад жаргана.
Үс засуулвал: 
Суудал: 
