Жил бүрийн 12 сарын 11-нд тэмдэглэдэг Эрдэнэт хотын өдрийг угтаж, “Эрдэнэт хотын тулгамдсан асуудал, гарц, шийдэл” сэдэвт эрдэм шинжилгээний хурал өнөөдөр “Эрдэнэт цогцолбор” дээд сургууль дээр боллоо.
Орхон аймгийн Боловсрол, шинжлэх ухааны газар, “Эрдэнэт цогцолбор” дээд сургууль хамтран зохион байгуулсан тус хурлын зорилго нь өнөөдөр Эрдэнэт хотод ямар тулгамдсан асуудал байна вэ, гэдгийг судалгаагаар дэвшүүлж, тэдгээрт ямар гарц шийдэл байж болох эсэхийг хэлэлцэхэд чиглэж байв.
Эрдэм шинжилгээний хурлыг Орхон аймгийн Боловсрол, шинжлэх ухааны газрын дарга О.Ариунгэрэлт нээн, судлаачид чухал асуудалд анхаарлаа хандуулсанд олзуурхаж буйгаа илэрхийлсэн бол аймгийн төр болон хувийн хэвшлийн төлөөлөл, ерөнхий боловсролын болон их, дээд сургуулийн багш, эрдэмтэн судлаачид асуудлыг тал талаас нь хэлэлцэн, шинэ судалгааны ажлын туршлага, гарц шийдэл, санал санаачилгаасаа хуваалцлаа.
“Өнөөгийн тулгамдсан олон асуудалд эрдэмтэн судлаачид, ойрын үед хийсэн судалгаа шинжилгээний бүтээлдээ ямар гарц шийдлийг санал болгож, тэдгээрийг орон нутгийн удирдлагууд хэрхэн шийдэж, бодит ажил хэрэг болгох боломжтой эсэхийг тодорхойлох нь энэхүү хурлын ач холбогдол” гэж “Эрдэнэт цогцолбор” дээд сургуулийн Эрдэмтэн нарийн бичгийн дарга, доктор Д.Заяабаатар онцолсон.
“Эрдэнэт хотын тулгамдсан асуудал, гарц шийдэл” эрдэм шинжилгээний хуралд Орхон аймгийн Шинжлэх ухаан, технологийн паркийн захирал Г.Энхбаяр “Орон нутагт инновацын эко систем хөгжүүлэх, халтиргаанаас сэргийлэх материал үйлдвэрлэл”, “Эрдэнэт цогцолбор” дээд сургуулийн Политехник коллежийн багш Л.Ундраа “Эрдэнэт үйлдвэр” ТӨҮГ-т ашиглагдаж буй тээрмийн хуягийн шинэ материал гаргаж авах судалгааны үр дүн”, Ерөнхий боловсролын сургуулийн 4, 5-р сургуулийн багш нар “Эрүүл хүүхэд-Эрдэнэтийн баялаг”, Ерөнхий боловсролын сургуульд хөгжлийн бэрхшээлтэй хүүхдийг тэгш хамруулан сургаж буй арга туршлага”, “Эрдэнэт цогцолбор” дээд сургуулийн багш Б.Оюун “Эрдэнэт хот орчмын бохирдлыг бууруулах боломж” зэрэг 10 гаруй илтгэл хэлэлцэгдэж, асуулт хариулт өрнүүллээ. Судлаачдын илтгэлийг шүүж, үнэлэлт дүгнэлт өгөх шүүгчдийн бүрэлдэхүүнд доктор Ж.Баатархүү, ЭЦДС-ийн Эрдэмтэн нарийн бичгийн дарга, доктор Д.Заяабаатар, тус сургуулийн Суурь шинжлэх ухааны багш, доктор Б.Энхцэцэг, Нийгмийн ухааны салбарын эрхлэгчийн үүрэг гүйцэтгэгч, доктор Т.Энх-Амгалан, Орхон аймгийн БОАЖ-ын газрын мэргэжилтэн н.Энхсэлэнгэ нар ажиллав.
Эрдэнэт хотын өмнө тулгамдаж буй асуудлыг хэрхэн шийдэж, цаашид шинжлэх ухаанчаар хөгжүүлэх гарц шийдэлд эрдэмтэн судлаачид хувь нэмэр оруулахаар нэгдэж, гарсан санал дүгнэлтээ орон нутгийн удирдлагуудад уламжлахаар зорьж байна.
Нар минутад мандаж минутад жаргана.
Үс засуулвал: 
Суудал: 
