Эрдэнэт үйлдвэрийн 45 жилийн ойг угтаж Ил уурхайн хамт олон спортын олон төрлийн тэмцээн уралдаан зохион байгуулсны нэг нь өчигдөр болсон гурван үеийн волейболын тэмцээн юм. Энэхүү тэмцээнд есөн багийн 80 гаруй тамирчин оролцлоо. Эрдэнэт үйлдвэртэй олон жилийн хамтын ажиллагаатай “Micromine Mongolia” компанийнхан зочин багаар оролцсон нь энэ удаагийн тэмцээнийг илүү сонирхолтой, өрсөлдөөнтэй болгосноороо онцлог байв. Уурхайчид багийн ахлагчаараа Хөдөлмөрийн баатрууд, Гавьяат уурхайчид, удирдлагуудаа сонгосон бол гишүүдээ бүрдүүлэхдээ шинэ ажилтан, залуу ажилтан буюу лигийн тамирчин, инженер, техникийн ажилтан, ахмад, удирдах ажилтан, эмэгтэй ажилтан тус бүр нэгийг сонгосон нь бүх үе, ангиллын төлөөллийг жигд хамруулах, хүч тэнцүү байх нөхцөлийг бүрдүүлжээ. Тэмцээнд оролцогчдын хамгийн залуу нь 23 настай, “Механикийн мангасууд” багийн тамирчин, өрмийн туслах машинч Л.Цэрэнбат байсан бол хамгийн ахмад нь 73 настай, “Аянгын бурхад” багийн дасгалжуулагч, Монгол Улсын Хөдөлмөрийн баатар Т.Нямжав гуай байсан юм.
Ил уурхайн дарга Д.Нямдорж “Гурван үеийн хэлхээ” уурхайчдын нөхөрсөг тэмцээнийг нээж хэлсэн үгэндээ, өнөөдөр бид халуун ам бүлээрээ цуглаж, эв нэгдлийн баяр, эрч хүчний бэлгэдэл болсон тэмцээнийг зохион байгуулж байна. Алдар гавьяатнууд, ахмадуудаасаа суралцах, үг сургаалыг нь сонсох сайхан боломж тохиосонд сэтгэл өндөр байгаагаа илэрхийлээд, баг тамирчдад амжилт хүсэв.
Ил уурхайн Залуучуудын холбоо, Эмэгтэйчүүдийн зөвлөл, Ахмадын холбоо хамтран зохион байгуулсан волейболын тэмцээнд С.Гандуулга ахлагчтай “Монгол мазаалай” баг түрүүллээ. Харин Ч.Гансүх ахлагчтай “Аянгын бурхад” баг дэд байрт шалгарч, Л.Баярбат ахлагчтай “Их тэсрэлт” баг гутгаар байр эзэлсэн юм. Эв нэгдлийн илэрхийлэл болсон энэхүү тэмцээний Шилдэг дасгалжуулагчаар ахмад Л.Мөнхтогтох, Шилдэг зохион байгуулагчаар ахмад М.Мягмар, Шилдэг эмэгтэй тоглогчоор хүний нөөцийн мэргэжилтэн Т.Халиун, Шилдэг довтлогчоор экскаваторын туслах машинч А.Эрдэнэбаяр, Шилдэг холбон тоглогчоор Ерөнхий инженер Л.Баярбат тодорч, шагналаа гардлаа.
Нар минутад мандаж минутад жаргана.
Үс засуулвал: 
Суудал: 
