Монгол Улсын Дотоод аудиторуудын долоо дахь удаагийн форум энэ сарын 15-ны өдөр Улаанбаатар хотноо зохион байгуулагдлаа. “Grounded and Strong” уриан дор болсон тус форумд 350 гаруй дотоод аудиторууд, эрсдэл, хяналтын ажилтнууд, дотоод аудитын салбарын мэргэжилтнүүд оролцож, салбар дахь асуудлуудаа хэлэлцэн санал бодлоо солилцсон байна.
Форумд “Эрдэнэт үйлдвэр” ТӨҮГ-ын Дотоод хяналт, мониторингийн хэлтсийн дарга Б.Энхжин дараагийн форум болон сургалтуудад уул уурхайн салбарын компаниудыг уриалан идэвх, санаачилгатай оролцох, цаашид үйлдвэрийн газрын дотоод хяналт шалгалт, аудитын үйл ажиллагааг олон нийтэд таниулан сурталчилж, “Монголын Үндэсний Дотоод Аудиторуудын Холбоо” ТББ-тай нягт хамтран ажиллахаа илэрхийллээ. Энэ удаагийн форумд Засаглал, Эрсдэлийн удирдлага, Дотоод хяналт, Залилан, Олон Улсын Мэргэжлийн Практикийн Хүрээний шинэчлэл, Олон Улсын Дотоод Аудиторуудын Институтийн хэрэгжүүлж буй шинэ төслүүд, Дотоод аудитын мэргэжлийн сертификатууд зэрэг сэдвээр олон улсын болон дотоодын шилдэг мэргэжилтнүүд 10 гаруй илтгэлийг танилцуулж, хэлэлцэв.
Монголын Үндэсний Дотоод Аудиторуудын Холбоо ТББ нь “Дотоод Аудиторуудын Олон Улсын Институт”-ын Монгол Улс дахь албан ёсны цорын ганц төлөөлөл бөгөөд дэлхийн 170 гаруй улс орон, бүс нутгийн 200 орчим мянган гишүүдэд үйлчилдэг дотоод аудитын бодлого, стандартыг боловсруулагч, мэргэжлийн холбоо юм.
Холбоо нь байгууллагын засаглал, дотоод хяналтын систем, эрсдэлийн удирдлагын тогтолцоог сайжруулах, дотоод аудитын олон улсын тэргүүн туршлага солилцох, стандартын дагуу хөгжүүлэх чиглэлээр үйл ажиллагаа явуулахын зэрэгцээ дотоод аудитын үнэ цэнийг олон нийтэд сурталчлах, тулгамдаж буй хүндрэл бэрхшээлийг тодорхойлох, бодлого тодорхойлогч төрийн байгууллагуудад дотоод аудиторуудын дуу хоолойг хүргэх зорилготой энэхүү форумыг 2017 оноос эхлэн “Монгол улсын Дотоод аудиторуудын форум” нэрээр тогтмол зохион байгуулж буй аж.
Нар минутад мандаж минутад жаргана.
Үс засуулвал: 
Суудал: 
