Монгол Улсад санхүүгийн байгууллага үүсэж хөгжсөний 112 жилийн ой, санхүүчдийн баярын өдрийг угтаж Монголын мэргэшсэн нягтлан бодогчдийн институтээс Орхон аймгийн Засаг даргын тамгын газар, “Эрдэнэт үйлдвэр” ТӨҮГ-тай хамтран Эрдэнэт хотод бүртгэл, санхүү, эдийн засгийн чиглэлийн мэргэжил сурталчлах 14 хоногийн аяныг өнөөдрөөс эхлүүллээ. Энэхүү аяны нээлт “Эрдэнэт үйлдвэр“ ТӨҮГ-ын “Оюу” танхимд өнөөдөр болж, Орхон аймгийн ИТХ-ын дарга Д.Мөнхбат, Засаг даргын орлогч М.Түмэнжаргал, Эрдэнэт үйлдвэрийн Санхүү, нягтлан бодох хэлтсийн дарга, Ерөнхий нягтлан бодогч Д.Баярбат, Эдийн засгийн хэлтсийн дарга Р.Очбадрах, Дотоод хяналт, мониторингийн хэлтсийн дарга Б.Энхжин, Монголын мэргэшсэн нягтлан бодогчдын институтийн Удирдах зөвлөлийн гишүүн Л.Энх-Амгалан болон аймгийн холбогдох газар, хэлтсийн удирдлага, мэргэшсэн нягтлан бодогчид, бүртгэл, санхүүгийн ажилчид, эдийн засагчид оролцлоо.
Энэ үеэр “Эрдэнэт үйлдвэр” ТӨҮГ-ын Санхүү, нягтлан бодох хэлтсийн дарга, Ерөнхий нягтлан бодогч Д.Баярбат, Улсын баатар үйлдвэрийн уурхайчин хамт олон энэ онд дөрвөн их наяд төгрөгийн борлуулалтын орлоготой, улс, орон нутгийн төсөвт хоёр их наяд төгрөг төвлөрүүлэхээр төлөвлөн амжилттай ажиллаж байгааг онцлон тэмдэглэсэн юм. Түүнээс гадна Эрдэнэт үйлдвэр нягтлан бодох бүртгэлийн бодлогын баримт бичгээ “Эрдэнэт цогцолбор” дээд сургуулийнхаа эрдэмтэн багш нартай хамтран шинэчилж байгаа энэ үед Монголын шилдэг мэргэшсэн нягтлан бодогч, эдийн засагч, эрдэмтэн багш нараас зөвлөгөө авах боломж бүрдсэнд олзуурхаж байгаагаа илэрхийлээд, аяны үйл ажиллагаанд амжилт хүслээ.
Орхон аймгийн хэмжээнд өрнөж буй энэхүү аяны хүрээнд санхүүгийн тайлагналын Олон улсын стандарт, Улсын секторын нягтлан бодох бүртгэлийн Олон улсын стандартын сургалт, иргэдэд санхүүгийн боловсрол олгох, цахим халдлагад өртөхөөс сэргийлэх сургалт, “Санхүүчдийн цом-2023” спортын тэмцээн, их, дээд сургуулийн оюутнуудтай хийх уулзалт, ярилцлага, Оны шилдэг шалгаруулах ёслол зэрэг үйл ажиллагаа зохион байгуулагдах юм.
Нар минутад мандаж минутад жаргана.
Үс засуулвал: 
Суудал: 
