Ган бөөрөнцгийн цех 19834 тонн бүтээгдэхүүн үйлдвэрлэнэ

Энэ онд Ган бөөрөнцгийн цех нийт 19834 тонн бүтээгдэхүүн үйлдвэрлэхээр төлөвлөжээ. Одоогийн байдлаар 40 мм-ийн ган бөөрөнцгийн төлөвлөгөөг 107,8 хувиар давуулан биелүүлээд байна. Харин 80 мм-ийн ган бөөрөнцгийн төлөвлөгөө 91,4 хувийн биелэлттэй яваа аж. Он дуустал 1457 тонныг нэмж үйлдвэрлэх юм. Мөн гурван мянган тонн нэмэлт бэлдэц авах гэрээ хийгджээ. 
Ган бөөрөнцгийн цехийн Ерөнхий инженер Б.Анх-Эрдэнэ: “Эрдэнэт үйлдвэрийн түүхт 45 жилийн ойг угтаж, манай цехийн хамт олон зургаан төрлийн ажил хийхээр төлөвлөсөн. Үүний дөрвөн ажлыг хийсэн. Хоёр ажил хийгдээд явж байна. Энэ 12-р сарын 25 гэхэд төлөвлөгөөний дагуу бүрэн хийгдэх ёстой. “Мэргэжлээ сурталчилъя” сэдэвтэй аян өрнүүллээ. Хүн бүр нэг бүтээлч ажил гэсэн санал авч байна. Эндээс шалгарсан саналыг төсөл хөтөлбөр болгон хэрэгжүүлнэ. Манай цехийн индукцийн шугам 40 мянган тонныг үйлдвэрлэх хүчин чадалтай. Энэ онд 20 мянган тонныг үйлдвэрлэхээр төлөвлөсөн нь суурилагдсанаас хойш хамгийн өндөр бүтээмжтэй ажиллахаар байгаа. Хүчин чадлынхаа 85 хувьд хүрч ашиглах боломжтой. Ингэхийн тулд 27- 28 мянган тонн ган бөөрөнцөг үйлдвэрлэнэ гэсэн үг. Тэгэхээр хоёр шугам зэрэг ажиллана. Хүн хүчний асуудал яригдана. Эдийн засгийн тооцоо хийгдсэн. Манай цехийн үйлдвэрлэлийн технологи өмнөхөөсөө эрс сайжирсан. Одоогоор импортоор авдаг бөөрөнцөгтэй чанарын хувьд дүйж байгаа. Ирэх жилээс Баяжуулах үйлдвэрийн Өөрөө нунтаглах хэсэгт манай бүтээгдэхүүнийг ашиглахаар төлөвлөсөн. Энэ нь манай цехийн бүтээгдэхүүний чанар хэр ахисныг харуулж байгаа юм” гэв.