“Аюулгүй ажилласан он жилүүд” үйл ажиллагаа боллоо

Эрдэнэт үйлдвэрийн түүхт ойн хүрээнд ХАБЭА-ын хэлтсээс ахмад ажилтнуудаа урьж, “Аюулгүй ажилласан он жилүүд” үйл ажиллагааг өнгөрсөн баасан гарагт зохион байгууллаа. Энэхүү үйл ажиллагаанд тус хэлтсийн болон үйлдвэрийн цехүүдэд ХАБ-ын ажлыг хариуцаж байсан 25 ахмад хүрэлцэн ирлээ. Тэднийг цехийн удирдлага, хамт олон хүндэтгэн хүлээн авсан. Захиргааны нэгдүгээр байранд болсон уулзалтыг нээж ХАБЭА-н хэлтсийн дарга Д.Мөнхболд хэлсэн үгэндээ, “Баялаг бүтээгч уурхайчдынхаа эрүүл, аюулгүй ажиллах 45 жилийн түүхийг бүтээлцсэн та нарын маань оруулсан хувь нэмэр, алдар гавьяа маш их, гэж тодотгон, та бүхнийхээ эхлүүлсэн ажлыг нэр төртэй үргэлжлүүлнэ” гэв. ХАБЭА-н хэлтэс, албадууд өнөөгийн үйл ажиллагаа, ирээдүйн төлөвлөгөөгөө ахмадууддаа танилцуулав. Тэдний уулзалт ярилцлага түүх, дурсамж хөвөрсөн халуун дотно яриагаар үргэлжиллээ. Түүнчлэн, тус хэлтсийнхэн ахмадууддаа Эрдэнэт үйлдвэрийн виртуал музейг сонирхуулан, Ил уурхай, Баяжуулах үйлдвэр, Засвар, механикийн заводын өргөтгөл шинэчлэлийг танилцуулав. Түүнчлэн, ахмадууддаа гарын бэлэг гардуулж, зарим ажилтнаа шагнаж урамшуулав. Уригдсан ахмадууд нэгэн өдрийг дурсамжаа сэргээн, үйлдвэрийнхээ хөгжил цэцэглэлтийг харж баясан, сайхан өнгөрүүллээ.