Эрдэнэт үйлдвэрийн 45 жилийн ойн спорт, урлагийн үйл ажиллагаанууд
амжилттай зохион байгуулагдаж байна
Эрдэнэт үйлдвэрийн удирдах ажилтны даваа гарагийн ээлжит шуурхай зөвлөгөөн боллоо. Зөвлөгөөний эхэнд Спорт цогцолбороос Эрдэнэт үйлдвэрийн 45 жилийн ойн хүрээнд зохион байгуулсан “Удирдлага -2023” спортын олон төрөлт тэмцээний шилгүүдийг танилцуулж, медаль дурсгалын зүйлс гардуулсан. Тэмцээнд удирдах 100 гаруй ажилтан оролцсон байна. Үйлдвэрийн газрын хэмжээнд Төрийн хэмнэлтийн тухай хуулийг хэрэгжүүлж ажиллаж байгаа хэдий ч уурхайчид 45 жилийн түүхт ойн хүрээнд спорт, урлагийн олон төрлийн үйл ажиллагааг өөрсдийн хүч, боломж, авьяас чадвараараа зохион байгуулж байгаад баяр хүргэлээ. Эрдэнэт үйлдвэрийн 45 жилийг ойг тэмдэглэн өнгөрүүлэх ажлыг зохион байгуулах ажлын хэсэг байгуулагдсан. Ирэх сарын 14-нд анхны баяжмалаа дэлхийн зах зээл дээр гаргасан түүхэн ойн баярын хурал, хүндэтгэлийн концерт болно.
Байгаль орчны менежментийн төлөвлөгөөг 93,6 хувьтай биелүүллээ
Өнгөрсөн долоо хоногт хөдөлмөрийн аюулгүй байдал, эрүүл ахуйн асуудлаар хэвийн ажилласан байна. Эрдэнэт үйлдвэрийн 2023 оны Байгаль орчны менежментийн төлөвлөгөө 93,6 хувьтай үнэлэгдсэнийг Байгаль орчин, ногоон хөгжлийн хэлтээс мэдээллээ. Мөн үйлдвэрийн газрын Ерөнхий захирлын албан даалгавраар өнгөрөгч баасан гарагт Говил, Баянцагаан багийн 58 иргэнд Хаягдлын аж ахуйд цагаан тоос дарах ажлыг газар дээр нь танилцуулсан байна.
Үйлдвэрлэл хэвийн, бүтээн байгуулалтын ажлууд үргэжилж байна
Өнгөрсөн шуурхай зөвлөгөөнөөс өгөгдсөн, технологийн материал, өвлийн дизель түлшний нөөц бүрдүүлэх, хөрөнгө оруулалт бүтээн байгуулалтын ажлын хяналт, үр дүн, 2024 оны хөрөнгө оруулалтын төлөвлөгөөтэй холбоотой үүрэг даалгаврын биелэлтийг Үйлдвэрлэлийн хэлтсийн дарга Т.Түмэн-Өлзий танилцууллаа. Эрдэнэт үйлдвэрийн үйлдвэрлэлийн цехүүд, газар, хэлтсийн удирдлагууд үйлдвэрлэлийн хэвийн ажиллагааг хангах, техник технологийн шинэчлэл, хангамжтай холбоотой цаг үеийн асуудлаар мэдээлэл хийлээ. Намар, өвлийн бэлтгэл ажил 95 хувьтай байна.
Эрдэнэт үйлдвэрийн хүчин чадал өсөн нэмэгдэж байгаа энэ үед хаягдлын сангийн насжилтыг уртасгах, Баяжуулах үйлдвэрийн Хаягдлын аж ахуйн найдвартай ажиллагааг хангах зорилгоор шинээр 16-р далан барих бүтээн байгуулалтын ажил дуусч байгааг мэдээллээ. Засвар, механикийн заводын Цутгуурын цехийн өргөтгөл хуваарийн дагуу үргэлжилж байна.