Эрдэнэт үйлдвэрийн Байгаль орчин, ногоон хөгжлийн хэлтсээс санаачлан, Баяжуулах үйлдвэр, Орхон аймгийн Баян-Өндөр сумын Засаг даргын тамгын газар хамтран Говил, Баянцагаан багийн вокзалын хэсгийн иргэдэд цагаан тоос дарах ажлын явцыг газар дээр нь үзүүлэх, танилцуулах үйл ажиллагааг өнөөдөр зохион байгууллаа. Энэхүү үйл ажиллагаанд Баян-Өндөр сумын Засаг дарга Б.Баасансүрэн оролцож, хоёр багийн иргэдийн төлөөлөл болох 50 гаруй хүн хамрагдав.
Энэ үеэр Баяжуулах үйлдвэрийн Ерөнхий инженер Г.Цогтгэрэл, Цагаан тоос дарах товчооны Тэргүүлэх инженер Л.Одонтунгалаг, Байгаль орчин, ногоон хөгжлийн хэлтсийн инженер Н.Наранчимэг нар цагаан тоосны дэгдэлтийн эсрэг авч хэрэгжүүлж буй ажлын талаар мэдээлэл хийж, техникээр болон намираа хоолойгоор тоос дарах ажиллагааг үзүүллээ.
Өнгөрсөн оны 12-р сараас 100 метрийн урттай, цаашаа 200 метр хүртэл задрах боломжтой 3000 намираа хоолойгоор Хаягдлын аж ахуйн нэг, хоёрдугаар хэсгийг норгох ажиллагаа хийгдэж байна. Мөн Байгаль орчин, ногоон хөгжлийн хэлтсээс цохилттой 10 буу өгснийг ашиглаж байгаагаа Баяжуулах үйлдвэрийн Цагаан тоос дарах товчооны Тэргүүлэх инженер Л.Одонтунгалаг мэдээлсэн. Түүнээс гадна Хүнд даацын машин техникүүдээр кальци хлорид, барьцалдуулагч бодис полимер урвалжтай уусмал цацах аргыг үргэлжлүүлэн ашиглаж байна.
Орхон аймгийн Байгаль орчин, аялал жуулчлалын газар, Эрдэнэт үйлдвэрийн Байгаль орчин, ногоон хөгжлийн хэлтэс хамтран Цагаан тоос дарах дэд хөтөлбөрийг амжилттай хэрэгжүүлсэн. 2024-2027 онд хэрэгжих хөтөлбөрийг аймгийн ИТХ-аар батлуулахаар ажиллаж байна гэж Байгаль орчин, ногоон хөгжлийн хэлтсийн инженер Н.Наранчимэг ярьсан юм. Түүнээс гадна нөлөөллийн бүсэд байгаа сургууль, цэцэрлэгийн цонхны салхивчинд тоосны шүүлтүүр тавих бэлтгэл хангагдаж байна. Мөн ирэх онд тоосжилтын бүсэд амьдардаг 2100 өрхийн төлөөллийг эрүүл мэндийн үзлэгт хамруулахаар төлөвлөжээ.
Нар 08:22 минутад мандаж 17:01 минутад жаргана.
Үс засуулвал: Өвчин ирнэ
Суудал: Огторгуй
