Монгол-Оросын найрамдал, хамтын ажиллагааны 63 дахь жилийн Найрамдлын сарын ажил Эрдэнэт хотод энэ сарын нэгнээс эхэллээ. 2023 онд Эрдэнэтийн-Овоо ордод хайгуулын ажил эхэлсний 60 жил, хамтарсан Эрдэнэт үйлдвэрийг байгуулах анхны хэлэлцээр байгуулагдсаны 50 жил, анхны баяжмалаа экспортод ачиж, үйл ажиллагаагаа эхэлсний 45 жилийн түүхэн ой тохиож байна. Мөн найрамдлын сард 1921 оны 11-р сарын 05-ны өдөр Монгол Улс, ЗСБНХУ-ын хооронд дипломат харилцаа тогтоосны 102 жилийн ойн өдөр тохиож байгаа юм. Иймээс тэгш ой нь тохиож буй үйл явдалд оролцож, залуу халуун насаа зориулж явсан ахмад, дунд үеийнхний алдрыг мөнхжүүлэх, тэдэнд хүндэтгэл үзүүлэхэд гол үйл ажиллагаагаа чиглүүлэх юм. Найрамдлын сарын хүрээнд Монгол-Оросын найрамдлын “Эрдэнэт” нийгэмлэг, Эрдэнэт үйлдвэрийн архив, Соёл, урлагийн цогцолбор хамтран Эрдэнэт үйлдвэр, хотын бүтээн байгуулалтын түүхэн, ховор нандин гэрэл зургаар энэ сарын 15-20-ны өдрүүдэд Соёл, урлагийн цогцолборын Арт галарейд үзэсгэлэн гаргана. Мөн Орос, Дагестаны суут яруу найрагч, нэрт соён гэгээрүүлэгч Расул Гамзатовын 100 жилийн ойд зориулсан дугуй ширээний ярилцлага, ЕБС-ийн сурагчдын дунд “Р.Гамзатовын шүлгийг хэн сайн мэдэх вэ?” АХА тэмцээн, Орос хэлний гурван үеийн багш нарын дунд дурсамж уулзалт, МЗЭ-ийн салбарын гишүүдийн дунд уулзалт, ярилцлага зэргийг энэ сарын 06-15-ны өдрүүдэд зохион байгуулахаар төлөвлөж байна. Түүнээс гадна Спорт цогцолбор, “Уран мод” шатрын клубтэй хамтран ОХУ-д их, дээд сургууль төгсөгчдийн дунд шатрын тэмцээн, ЕБС-ийн сурагчдын дунд футзалны тэмцээн зохион байгуулна. Мөн “Эрдэнэт цогцолбор” дээд сургуулийн дэргэдэх Орос хэлний төв, Орос 19-р сургууль, 12-р цэцэрлэгийн хамт олон найрамдлын сард олон ажил төлөвлөн хэрэгжүүлж байна.
Эрдэнэтчүүд та бүхнийг өргөнөөр оролцохыг урьж байна. Найрамдлын сарын ажил 12-р сарын 15-ны өдөр хүртэл үргэлжилнэ.
Монгол-Оросын найрамдлын “Эрдэнэт” нийгэмлэгийн Тэргүүн Б.МАЖИНБУУ
Нар минутад мандаж минутад жаргана.
Үс засуулвал: 
Суудал: 
