Удирдах ажилтнуудын шуурхай зөвлөгөөний тойм

Халтиргаа гулгаа үүсэхээс сэргийлж ажиллахыг хариуцсан цех нэгжүүдэд анхаарууллаа

Эрдэнэт үйлдвэрийн удирдлагуудын даваа гаригийн ээлжит шуурхай зөвлөгөөнийг Ерөнхий инженер Т.Батмөнх удирдав. Тэрээр шуурхайн эхэнд цаг агаарын нөхцөл байдалтай холбогдуулан үйлдвэрийн бүс дэх бүхий л зам талбайн цасыг тогтмол цэвэрлэж, халтиргаа гулгаа үүсэхээс сэргийлж ажиллахыг хариуцсан цех нэгжүүдэд анхаарууллаа.  ХАБЭА-н хэлтсийн санаачилгаар эхэлсэн “Сонор, сэрэмж” аян үйлдвэрийн хэмжээнд үргэлжилж байна. Аянд бүтцийн нэгжүүд идэвх санаачилгатай нэгдэж, шөнийн ээлжийн ажил байдалд хяналт шалгалт хийхэд хамтран ажиллаж  буйг ХАБЭА-н хэлтэс мэдээлэлдээ онцоллоо. Байгаль орчин, ногоон хөгжлийн хэлтсээс бүтцийн нэгжүүдийн үйл ажиллагаанд хяналт тавихын зэрэгцээ 58 дугаар ангийн зүүн жалганаас хүчиллэг усны гаралт багассан тухай мэдээллээ. Төв далангийн хүчиллэг усны PH нь 3.72, булгийн усных 7.29 хувь байгаа нь хэвийн үзүүлэлт гэдгийг дурьдлаа. Энэ жил намар өвлийн бэлтгэл ажлын хүрээнд нийт 298 ажил хийхээр төлөвлөснөөс 276 нь бүрэн биелж, 95.6 хувийн гүйцэтгэлтэй байна.

Урьдчилан сэргийлэх үзлэгт идэвхтэй хамрагдахыг уриалав

Үйлдвэрийн ажилтнуудыг эрүүл мэндийн урьдчилан сэргийлэх үзлэгт хамруулах ажил 79 хувьтай, үүнд цех нэгжүүд ахмадууд, ажилтнуудаа идэвхтэй хамруулахыг  Хамтын ажиллагаа, нийгмийн харилцааны газрын албаны дарга Д.Өнөбат онцоллоо. Энэ мэдээлэлтэй холбогдуулан цех нэгжүүд анхаарал хандуулж буйгаа тус тусын  мэдээлэлдээ онцолсон. Тухайлбал, Ил уурхайн 392 ажилтан хамрагдаж, биелэлт 75.6 хувьтай байгаа бөгөөд энэ сарын дундуур бүрэн хамрагдаж дуусах юм байна. Авто тээврийн цехийн 777 ажилтан буюу 89 хувь нь эрүүл мэндийн үзлэгтээ хамрагджээ. Засвар механикийн заводаас эрүүл мэндийн урьдчилан сэргийлэх үзлэгт нийт ажилтны 394 нь хамрагдаад байгаа бол  Дулааны цахилгаан станцын ажилтнуудын 85 хувь нь хамрагджээ. Түүнчлэн Цахилгаан станцын ажилтнуудын 90 хувь нь, Ус хангамжийн цехийнхэн 100 хувь эрүүл мэндийн үзлэгт хамрагдсаныг удирдлагууд нь мэдээллээ. 

“Энэ цагийн эгэл баатрууд” урлагийн их наадамд уурхайчид өрсөлдөнө

Өнгөрсөн сарын 23-наас эхэлсэн “Энэ цагийн эгэл баатрууд” уурхайчдын урлагийн их наадмын бэлтгэл дуусаж, наадмын үзүүлбэрүүд  Мягмар гаригаас тоглогдоно гэж Соёл урлагийн цогцолборын дарга Б.Баттулга мэдээлж, наадмын бэлтгэл ажилд ажилтнуудаа дэмжин, хамтран ажилласан бүтцийн нэгжүүдийн удирдлагад талархал илэрхийлэв. Урлагийн их наадамд нийт 28 бүтцийн 16 баг өрсөлдөх юм байна.