Монгол Улсын баатар Эрдэнэт үйлдвэрийн нийгмийн чиглэлийн хөрөнгө оруулалтын нэгээхэн хэсэг Булган аймгийн Хангал сумын төвд 75 хүүхэд хүлээн авах хүчин чадалтай цэцэрлэгийн шинэ барилга болон бослоо. Тус үйлдвэрийн 1.2 тэрбум төгрөгийн санхүүжилтээр хаяа залган оршдог Хангал сумынхан түүхт 100 жилийнхээ босгон дээр “Янзага” хүүхдийн цэцэрлэгийн шинэ барилгаа ашиглалтад хүлээн авч байна. Сүүлийн 30 гаруй жилийн турш хүүхдийн цэцэрлэгээ өргөтгөн шинэчлэх тус сумынхны хүсэл мөрөөдлийг ийнхүү Эрдэнэт үйлдвэр хамтын ажиллагааны хүрээнд биелүүлж өгсөнд сумын иргэд баяртай байгааг Засаг дарга М.Төмөрбат барилгын нээлтийн үеэр онцоллоо.
“Янзага” цэцэрлэгийн шинэ барилгын нээлтийн ажиллагаанд Булган аймгийн ИТХ-ын дарга Д.Эрдэнэбат болон Хялганат хороо, Хангал сумын удирдлагууд оролцсон бол хөрөнгө оруулагч Эрдэнэт үйлдвэрийг төлөөлж Тамгын газрын дарга Д.Үүрийнтуяа, Хамтын ажиллагаа, нийгмийн харилцааны газрын Нийгмийн харилцааны албаны дарга Д.Өнөбат нар хүрэлцэн ирж, баяр хүргэлээ. Эрдэнэт үйлдвэрийн Тамгын газрын дарга Д.Үүрийнтуяа энэ үеэр, “Эрдэнэт үйлдвэр жил тутам Булган, Орхон аймгуудтай хамтын ажиллагааны гэрээ байгуулан нийгэм, дэд бүтэц, байгаль орчин, экологийн чиглэлээр хийж хэрэгжүүлж буй ажлуудаа дүгнэн хэлэлцдэг. Одоо бид Булган аймагтайгаа нийт 61 төрлийн ажлыг төлөвлөн хийж байна. Сүүлийн 5 жилд буюу 2018 оноос хойш бид Булган аймагтай 5.2 тэрбум төгрөгийн санхүүжилт бүхий хамтын ажиллагааны гэрээ байгуулснаас 1 тэрбум 276 сая төгрөгийн хөрөнгө оруулалт нь хүүхдийн цэцэрлэг, ирээдүй хойч үеийнхэнд том өгөөж болон ирж буйд уурхайчин хамт олон бид туйлын баяртай байна. Сумын олон аав ээжүүд үр хүүхдээ ая тухтай цэцэрлэгт үлдээж, өөрсдөө сэтгэл тайван ажиллаж, хөдөлмөрлөх сайхан боломж бүрдүүлж, хөрөнгө оруулалтыг үр дүнтэй хүртээмжтэй бүтээн байгуулалт болгож чадсан Булган аймаг, Хангал сумын удирдлагуудад чин сэтгэлийн халуун талархал илэрхийлье” гэж хэлсэн үгэндээ онцлон тэмдэглэв.
2015 оноос эхэлсэн Булган аймаг, Эрдэнэт үйлдвэрийн хамтын ажиллагаа нийгмийн чиглэлд илүү өргөжин, нягтарч байна. Эрдэнэт үйлдвэр энэхүү гэрээний хүрээнд хөрөнгө оруулалт, санхүүжилтийн хэмжээг жил бүр ахиулан сүүлийн жилүүдэд тэрбум төгрөгийг Булган аймгийн хөгжил дэвшилд зориулдаг болсонд Булган нутгийн иргэд талархаж явдаг. Нийгмийн хариуцлагаа цаг ямагт хэрэгжүүлэн аймаг орон нутгаа үргэлж дэмжин хамтран ажиллаж байгаа Эрдэнэт үйлдвэрийн нийт хамт олон, уурхайчдадаа баярлалаа гэдгээ Булган аймгийн ИТХ-ын дарга Д.Эрдэнэбат нээлтийн үеэр уламжиллаа.
Шинээр ашиглалтад орж буй “Янзага” цэцэрлэгийн барилгыг “Тэнгэрийн хишиг” ХХК барьж, гүйцэтгэсэн байна. Мөн энэ өдөр Хангал сумынхан орон нутгийн төсвийн хөрөнгөөр Ерөнхий боловсролын сургуулийн дэргэд иж бүрэн биеийн тамир, хүүхдийн тоглоомын талбай тохижуулж, хүлээн авлаа. Зам дагаж хөгжил ирдэг. Эрдэнэт үйлдвэрийн хөрөнгө оруулалтаар Эрдэнэт-Хангал-Хялганатыг холбосон шинэ авто зам энэ намар ашиглалтад орсон. Үүнийг дагаад орон нутагт дэд бүтэц, нийгэм соёлын олон бүтээн байгуулалтууд ирэх жилүүдэд хийгдэж эхлэх юм.