Монголын бизнес эрхлэгч эмэгтэйчүүдийн холбооны бодлогын зөвлөл болон аймаг, нийслэл, дүүргийн салбар зөвлөлийн тэргүүнүүд Орхон аймаг дахь бизнес эрхлэгч эмэгтэйчүүдтэй уулзаж, хэлэлцүүлэг өрнүүллээ. Энэ үеэр “Эрдэнэт үйлдвэр” ТӨҮГ-ын Тамгын газрын дарга, Монголын Эмэгтэйчүүдийн холбооны Орхон аймаг дахь салбар зөвлөлийн Тэргүүн Д.Үүрийнтуяа Эрдэнэт үйлдвэрийн удирдлага, хамт олон бизнес эрхлэгчдийг, тэр дундаа дотоодын бизнес эрхлэгчдийг дэмжих бодлогыг тууштай хэрэгжүүлж, орон нутагтай хамтран ажиллаж байгаагаа хэлсэн юм. Энэ онд гэхэд Жаргалант сум, Говил багт тариалан эрхэлдэг таван аж ахуйн нэгжээс үйлдвэрийн нийт хүнсний ногооны хэрэгцээг бүрэн хангаж авсан. Эрдэнэт үйлдвэрийн 2024 оны худалдан авалтын төлөвлөгөөнд дотоодын үйлдвэрлэгч нар хийх боломжтой ажил, үйлчилгээг гаднаас импортоор худалдаж авахгүй байх бодлого тусгагдаж байна. Ийм учраас бизнес эрхлэгч бүсгүйчүүдийн үйл ажиллагааг бүрэн дүүрэн дэмжих боломжтой хэмээн онцоллоо. Дашрамд, тэрээр Эрдэнэт үйлдвэрийн эдийн засгийн төлөвлөгөөт үзүүлэлтүүд оны эхний есөн сарын байдлаар бүрэн биелж явааг танилцуулсан. Тухайлбал, борлуулалтын орлогыг 12,4 хувиар, татварын өмнөх ашиг 46 хувиар, улс, орон нутгийн төсвийн орлогын төлөвлөгөөг 31,3 хувиар тус тус давуулан биелүүлсэн амжилттай ажиллаж байгааг дурдаад, баялаг бүтээгч уурхайчин хамт олны ажлын үр дүн юм хэмээн цохон тэмдэглэв. Эрдэнэт үйлдвэр оны эхний есөн сарын байдлаар улс, орон нутгийн төсөвт 1 их наяд 554 тэрбум төгрөг төвлөрүүлжээ.
Орхон аймаг дахь бизнес эрхлэгч эмэгтэйчүүдийн холбооноос санаачлан Монголын бизнес эрхлэгч эмэгтэйчүүдийн холбоо, Орхон аймгийн Засаг даргын тамгын газар, Монголын Эмэгтэйчүүдийн холбооны Орхон аймаг дахь салбар зөвлөл хамтран зохион байгуулж буй уг уулзалтаар 21 аймгийн бизнес эрхлэгч эмэгтэйчүүд ажил, амьдралд тулгамдаж буй асуудлаа нээлттэй ярилцаж, шийдвэрлэх арга зам, гарц шийдлээ олон талын оролцоотой эрэлхийлж, цаашид эдийн засагт жендерийн тэгш байдлыг хангах, эмэгтэйчүүдийн оролцоог нэмэгдүүлэхийн чухлыг онцлон хэлэлцлээ.
Монголын бизнесийн салбарт ажиллагчдын 69,1 хувийг эмэгтэйчүүд эзэлж байгааг Орхон аймаг дахь Бизнес эрхлэгч эмэгтэйчүүдийн холбооны Тэргүүн Д.Баярчимэг хэлсэн. Харин Орхон аймагт 5300 гаруй аж ахуйн нэгж бүртгэлтэйгээс 36 хувь нь тодорхой үйл ажиллагаа явуулж байна. Тэдний дийлэнх нь худалдаа үйлчилгээ, барилгын салбарт байгаа бол 1,8 хувь нь хөдөө аж ахуйн салбарт ажиллаж байна.