Уурхайчин гэр бүлүүд экскаватор бүтээжээ

Эрдэнэт үйлдвэрийн 45 жилийн ойг тохиолдуулан Аж ахуй, үйлчилгээний цех ажилчдынхаа дунд бүтээлч ажлын уралдаан зарласан. Энэ хүрээнд шинэ, залуу ажилтан Г.Шүрэнчулуун, Б.Үйлсзаяа нар гэр бүлийн найзуудынхаа хамтаар уул уурхайн хүчит техник экскаваторын загвар урлан бүтээж цэцэрлэгт хүрээлэнд байрлуулснаа өчигдөр цехийн хамт олонд хүлээлгэн өглөө. Энэ нь цех сурталчлах сарын аяны хаалтын оргил хэсэг, дурсгалт үйл явдал байсан юм. Энэхүү бүтээлийг Ил уурхайн ажилтан Т.Баярболд, Б.Хэрлэн, Ц.Цэнгүүнжав, Б.Дархан-Эрдэнэ, Ш.Амгаланбаатар, Б.Эрдэнэбаяр нарын гэр бүл хамтран гурван сарын турш урлажээ.

Цех сурталчлах сарын аяны хаалтын үеэр Аж ахуй, үйлчилгээний цехийн дарга Б.Туяа тэдэнд хандан талархал дэвшүүлэхдээ, Эрдэнэт үйлдвэрээр бахархах, уурхайчдын алдрыг мөнхлөхөд нөхөрлөлийн үнэ цэн, бүтээлч хөдөлмөрөөрөө үеийн залуустаа үлгэр дуурайлал үзүүлснийг нь онцлон баяр хүргэж, дурсамж, үнэ бүхий зүйл, тус бүр 100 мянган төгрөгөөр шагнаж урамшуулсан юм. Харин албан тасалгааны үйлчлэгч Г.Шүрэнчулуун, Б.Үйлсзаяа нарыг холбогдох журмын дагуу 500 мянган төгрөгөөр шагнав. 

Эрдэнэт үйлдвэрийн 40 жилийн ойгоор Аж ахуй, үйлчилгээний цехийн хэсэг ажилчид уурхайн тэнхээт хүлэг Белаз урлан бүтээж, Ерөнхий захиргааны хоёрдугаар байрны урд цэцэрлэгт хүрээлэнд байрлуулж байсан бол энэ удаа уурхайчин гэр бүлүүд Экскаватор бүтээж хослууллаа. 
Тус хамт олон цех сурталчлах сарын аяны хүрээнд 45 нэр төрлийн үзэмжит, ховор цэцэгсээр үзэсгэлэн гаргаж, цэвэрлэгээний бодис, цахилгаан гагнуурыг хэрхэн зөв ашиглах талаар зөвлөгөө таниулга хийсэн нь ажилчдын талархал хүлээсэн. Мөн бахархан дуурсах гурван үеийн уулзалт, Төр засгийн үйлчилгээ эрхлэх газартай хамтран Нийтлэг үйлчилгээний удирдах ажилтнуудын Улсын зөвлөгөөн, ажил мэргэжлийн ур чадварын Улсын анхдугаар уралдааныг Эрдэнэт хотод амжилттай зохион байгуулж, Аж ахуй, үйлчилгээний цехийн ажилчид тэргүүлсэн юм. Түүнээс гадна 17 аймгийн нийтлэг үйлчилгээний 100 гаруй ажилчдын дунд гар бөмбөгийн тэмцээн зохион байгуулж, цехийн үйл ажиллагаагаа сурталчилжээ. 

Сарын аяны хаалтын үеэр цэцэгсийн үзэсгэлэнд идэвх, санаачилгатай оролцсон ажилтан Б.Болднасан, Б.Сарантуяа, М.Сүххуяг, М.Нямбаатар, Г.Батчимэг, Б.Энхболор нарыг нэг өдрийн цалинтай чөлөөгөөр шагнаж, ХАБЭА-н хэлтсээс өрнүүлсэн үйлдвэрийн гоо зүйн аянд Аж ахуй, үйлчилгээний цех дэд байрт шалгарсныг дуулгаж, баяр хүргэснээр энэхүү үйл ажиллагаа өндөрлөв.