Эрдэнэт үйлдвэр, Орхон аймгийн төв доторх авто замын засварт 50 тэрбум төгрөгийн санхүүжилт хийнэ
Эрдэнэт хот доторх авто замын засварт зарцуулах 50 тэрбум төгрөгийн санхүүжилтийг шийдэх шаардлагатайг Ерөнхий захирал Г.Ёндон даваа гаригийн шуурхай зөвлөгөөний үеэр мэдээлэв. Ингэхдээ дээрх санхүүжилтийг түр зуур аргацаасан замын нөхөөсөнд бус чанартай авто зам барихад, зарцуулахад анхаарна гэлээ. Өнгөрсөн 9 сард Монгол Улсын Ерөнхий сайд Л.Оюун-Эрдэнэ, Орхон аймгийн иргэдтэй уулзах үеэрээ Эрдэнэт хот доторх авто замын засварт 50 тэрбум төгрөг төсөвлөх, энэ зардлыг Эрдэнэт үйлдвэрийн улс, орон нутгийн төсөвт төвлөрүүлэх орлогоос гаргахаар шийдвэрлэсэн юм.
Сонгон шалгаруулалтад 300 гаруй хүн оролцжээ
Өнгөрсөн долоо хоногт Хүний нөөц, захиргааны хэлтсээс зохион байгуулсан 5 цехийн 18 ажлын байрны сонгон шалгаруулалтад 1150 хүн оролцохоор бүртгүүлснээс 333 хүн оролцсон байна. Үүнээс Ил уурхайн дээж авагч ажилд 1 хүнийг шалгаруулж авсан бол хүнд даацын белазын жолоочийн сонгон шалгаруулалтад нийт 287 иргэн оролцож, 10 нь тухайн ажлын байранд ажиллахаар тэнцжээ. Мөн уулын технологийн зориулалттай хүнд даацын автомашины засварчны шалгаруулалтад 51 иргэн оролцож, 1 иргэнийг сонгон шалгаруулсан байна. Харин Түлшний аппаратурын засварчны сонгон шалгаруулалтад оролцогчдоос зохих түвшний оноо аваагүй тул уг шалгаруулалт хүчингүй болжээ. Түүнчлэн цахилгаан тоног төхөөрөмжийн засварчны орон тоон дээр 3 иргэн, ДЦС-ын цахилгааны монтёрын шалгаруулалтад 84 иргэн оролцсоноос 1 иргэн тус тус тэнцжээ. Дээрх мэдээлэлтэй холбогдуулан сонгон шалгаруулалтын үр дүнгээр ажилд орох иргэдийн эрүүл мэндийн үзлэгт онцгой анхаарч, чанартай зохион байгуулахыг Ерөнхий инженер Т.Батмөнх үүрэг болголоо.
“Эрдэнэтийн Овоо-60” эрдэм шинжилгээний хурлыг зохион байгуулахаар бэлтгэж байна
Энэ долоо хоногийн лхагва гаригт Улаанбаатар хотноо зохион байгуулах “Эрдэнэтийн Овоо-60” үйлдвэрлэл-эрдэм шинжилгээний хурлын бэлтгэл ажлын явцыг Геологи хайгуулын экспедицийн дарга М.Дамдинсүрэн шуурхайд мэдээлэв. “Эрдэнэт үйлдвэр” ТӨҮГ, Үндэсний геологийн алба, ШУТИС хамтран зохион байгуулах уг хурлын үеэр Эрдэнэтийн овооны өөрчлөлт замналыг харуулсан түүхэн гэрэл зураг, баримтаар үзэсгэлэн гаргах юм. Мөн Геологи хайгуулын экспедицээс Оюутын ордод хийх энэ оны төлөвлөгөөт өрөмдлөгийн ажил дуусаж буйг цехийн удирдлага онцлов. Оюутын ордын нөөцийг тогтоохоор нийт 31 цооног буюу 16500 тууш метр өрөмдлөг хийхээр төлөвлөснөөс хоёр цооногоос бусдыг бүрэн дуусгаж, дээжийг химийн лабораторид илгээгээд байна. Үлдсэн хоёр цооногийн өрмөдлөгийг ойрын өдрүүдэд дуусгахаар төлөвлөж байгаа аж. Мөн 9-р овоолго дээр 21 цооног буюу 1050 тууш метр өрөмдлөг гүйцэтгэж байна.
Нар минутад мандаж минутад жаргана.
Үс засуулвал: 
Суудал: 
