Удирдах ажилтнуудын шуурхай зөвлөгөөний тойм

Оны эхний 9 сард үйлдвэрлэлийн үндсэн үзүүлэлтийн төлөвлөгөө 100-аас дээш хувиар биеллээ

Эрдэнэт үйлдвэр хүдэр олборлолт, боловсруулалт, металл авалт зэрэг үйлдвэрлэлийн үндсэн үзүүлэлтийн төлөвлөгөөгөө оны эхний 9 сард 100-аас дээш хувиар биелүүлсэн байна. Гурван улирлын туршид нийт 29.6 сая тонн хүдэр олборлосон бол 27.8 сая хүдэр боловсруулжээ. Зэсийн металл авалт 100 хувь, молибдены металл авалт 105.7 хувиар биелж, үйлдвэрлэсэн баяжмал дахь металлын төлөвлөгөө 101-111 хувиар тус тус биелсэн байна. Энэ хугацаанд 451 мянган тонн ЗЭСИЙН БАЯЖМАЛ, 4.2 мянган тонн МОЛИБДЕН БАЯЖМАЛ үйлдвэрлэж, 100-105 хувиар төлөвлөгөөгөө биелүүлж ажиллалаа. 

Улс, орон нутгийн төсөвт 1.4 их наяд төгрөг төвлөрүүлээд байна

Оны эхний 9 сарын байдлаар, Эрдэнэт үйлдвэр нь  3.1 их наяд төгрөгийн орлоготой ажиллаж орлогын төлөвлөгөөг 112 хувиар, цэвэр ашгийн төлөвлөгөөг 148 хувиар тус тус биелүүлээ. Энэ хугацаанд үйлдвэрийн газар УЛС, ОРОН НУТГИЙН төсөвт нийт 1.4 их наяд төгрөг төвлөрүүлснээс  ашигт малтмалын нөөц ашигласны төлбөрт 644 тэрбум төгрөгийн татвар төлсөн байна. 

“Энэ цагийн эгэл баатрууд” уурхайчдын урлагийн их наадам болно

Таван жил тутам зохион байгуулдаг уурхайчдын урлагийн их наадам үйлдвэрийн 45 жилийн ойн хүрээнд  болж буйг Соёл, урлагийн цогцолборын дарга Б.Баттулга шуурхайд мэдээллээ. Наадмын удирдамжийг бүх цех нэгжийн удирдлагад хүргүүлсэн байна. Бүтцийн нэгжүүдийн удирдлагууд урлагийн их наадамд хамт олноо идэвхтэй оролцуулж, ажилтнуудынхаа авьяас билгийг нээж, хөгжүүлэхэд санаачилгатай ажиллахыг энэ үеэр уриалав. “Энэ цагийн эгэл баатрууд” урлагийн их наадмын шилдгүүд үйлдвэрийн 45 жилийн ойн хүндэтгэлийн тоглолтод оролцох юм байна.