Монгол Улсад нийтийн аж ахуйн үйлчилгээний салбар үүсэж хөгжсөний 92 жилийн ойн баярыг тохиолдуулан “Эрдэнэт үйлдвэр” ТӨҮГ-аас санаачлан Засгийн газрын хэрэг эрхлэх газрын харьяа Төр засгийн үйлчилгээ эрхлэх газартай хамтран зохион байгуулж буй Нийтлэг үйлчилгээний удирдах ажилтнуудын Улсын зөвлөгөөн өнөөдөр Эрдэнэт хотод эхэллээ. Энэхүү зөвлөгөөнд Төр засгийн үйлчилгээ эрхлэх газрын дарга Ж.Тамир, Орхон аймгийн Засаг даргын орлогч А.Түвшинжаргал, “Эрдэнэт үйлдвэр” ТӨҮГ-ын Хамтын ажиллагаа, нийгмийн харилцааны газрын албаны дарга Д.Өнөбат болон нийгмийн цехийн удирдлагууд, 21 аймгийн нийтлэг үйлчилгээний албаны дарга нар, төлөөлөгчдийн хамт оролцож байна.
Төр засгийн үйлчилгээ эрхлэх газрын дарга Ж.Тамир зөвлөгөөнийг нээж хэлсэн үгэндээ, нийтлэг үйлчилгээний чанарыг олон улсын түвшинд хүргэх, аюулгүй, таатай орчин бүрдүүлэх, төрт ёс, хүндэтгэлийн нарийн дэг жаягт суралцах, чадварлаг ажилчдыг төрүүлэх нь бидний эрхэм зорилго юм. Улсын анхдугаар зөвлөгөөн нийтлэг үйлчилгээгээр тэргүүлэгч Улсын баатар Эрдэнэт үйлдвэрт болж байгаад олзуурхаж байгаагаа илэрхийлээд зөвлөгөөний үйл ажиллагаанд амжилт хүсэв.
Энэ үеэр, Монгол Улсад нийтийн аж ахуйн үйлчилгээний салбар үүсэж хөгжсөний 92 жилийн ойн баярын хүрээнд хамт олноо манлайлж ажилласан зарим хүмүүст аймгийн болон салбарын шагнал гардууллаа. “Тэргүүний уурхайчин” цол тэмдгээр Аж ахуй, үйлчилгээний цехийн Эдийн засагч Н.Нарантуяа, Нийтийн ахуй үйлчилгээний Тэргүүний ажилтан цол тэмдгээр Албан тасалгааны үйлчлэгч О.Анхбаяр, С.Должин, Б.Сарантуяа, Сантехникийн слесарь Б.Мөнх-Орших, Спорт цогцолборын Үйлчлэгч Ж.Гангаамаа, Х.Энхмаа, “Эрдэнэт цогцолбор” дээд сургуулийн Жижүүр Н.Оюундэлгэр, Ч.Хишигжаргал нар энгэрээ мялаав. Харин Барилга, хот байгуулалтын яамны Жуух бичгээр Сантехникийн слесарь Б.Анхбаяр, Цахилгаан тоног төхөөрөмжийн засварчин Г.Болдбаатар, “Эрдэнэт цогцолбор” дээд сургуулийн Гадна талбайн цэвэрлэгч Г.Болзоо, Жижүүр Н.Энхжаргал, “Сэлэнгэ” амралт, аялал жуулчлалын цогцолборын Угаагч Э.Сарантуяа, Засварчин Б.Батболд, 19 дүгээр сургуулийн Үйлчлэгч Б.Оюунчимэг нар шагнагдав. Мөн Эрдэнэт үйлдвэрийн долоон ажилтан мэргэжлийн зэргээ ахиулж, үнэмлэхээ гардлаа.
Маргааш аймаг, нийслэлийн нутгийн захиргааны төв байгууллагын үйлчлэгч нарын дунд ажил мэргэжлийн ур чадварын Улсын анхдугаар уралдаан явагдах бөгөөд үйлчилгээний ажилтнууд албан болон ариун цэврийн өрөөний өдөр тутмын цэвэрлэгээг стандартын дагуу гүйцэтгэж өрсөлдөх юм.
Нар минутад мандаж минутад жаргана.
Үс засуулвал: 
Суудал: 
