Mongolian mining week-2023 буюу Монголын уул уурхайн долоо хоног 5 дахь өдрөө үргэлжилж байна. Өнөөдөр үдээс өмнө “Жендэрийн мэдрэмжтэй уул уурхайн засаглал” салбар хуралдааныг Уул уурхай хүнд үйлдвэрийн яам, Уул уурхайн үндэсний ассоциациас Merit төсөл, Australian Aid Amep хөтөлбөрийнхөнтэй хамтран зохион байгуулж байна.
“Жендэрийн мэдрэмжтэй уул уурхайн засаглал” салбар хуралдааныг Уул уурхай хүнд үйлдвэрийн яамны Төрийн нарийн бичгийн дарга С.Магнайсүрэн, “Эрдэнэт үйлдвэр” ТӨҮГ-ын Тамгын газрын дарга Д.Үүрийнтуяа нар нээж, үг хэлсэн.
“Эрдэнэт үйлдвэр” ТӨҮГ-ын Тамгын газрын дарга Д.Үүрийнтуяа тус салбар хуралдааныг нээж хэлсэн үгэндээ: Эрдэнэт үйлдвэр 7000 гаруй ажиллагсадтайгаас удирдах ажилтны 19 хувийг, инженер техникийн ажилтнуудын 51 хувийг, нийт ажиллагсдын 34 хувийг эмэгтэйчүүд эзэлдэг. Эрдэнэт үйлдвэрийн хувьд бусад уул уурхайн компаниуд, ААН-үүдээс онцлогтой. 45 жилийн өмнө үйлдвэр үйл ажиллагаагаа эхлүүлэхдээ сургууль, цэцэрлэг, эмнэлэг, спорт болон соёлын ордон гээд нийгмийн цехүүдийг дэргэдээ байгуулсан. Өнөөдрийн байдлаар нийгмийн цехүүдэд ажиллаж байгаа 1000 гаруй ажилчдын ихэнхи нь эмэгтэйчүүд байдгийг салбар хуралдаанд оролцсон зочдод танилцуулсан. Цаашид Эрдэнэт үйлдвэр инженер, техникийн чиглэлд эмэгтэйчүүдийн эзлэх байр суурийг нэмэгдүүлэх бодлого баримталж байна. Манай улс жендэрийн талаар баримтлах бодлогын баримт бичиг баталсан ч, жендэрийн тэгш байдал бүх түвшинд хангалтгүй байна. Шийдвэр гаргах, бодлогын түвшинд эмэгтэйчүүдийн оролцоог нэмэгдүүлэх, ялангуяа уул уурхайн салбарт жендэрийн мэдрэмжтэй байхын тулд хамтдаа хэлэлцэж, хүн бүр өөрчлөлтийг өөрөөсөө эхлүүлье гэж хэллээ.
Жендэрийн мэдрэмжтэй уул уурхайн засаглал салбар хуралдаанд УУХҮЯ-ны Төрийн захиргааны удирдлагын газрын дарга Г.Батбаяр, Геологи уул уурхай, газрын тос, хүнд үйлдвэрийн салбарт жендэрийн талаар баримтлах бодлогын /2019-2026/ хэрэгжилтийн тухай, Merit төслийн суурин төлөөлөгч Женнифер Адамс, Жендэрийн мэдрэмжтэй уул уурхайн засаглал, Олон улсын туршлага, Amep хөтөлбөрийн багийн ахлагч Рена Гүэндүэз, Компанийн зүгээс жендэрийн тэгш байдлыг хангах чиглэлээр хийж болох ажлууд сэдвээр илтгэл тавьж, нээлттэй хэлэлцүүлэг хийж байна.
Салбар хуралдааны зорилго нь Монгол Улсын уул уурхайн салбарт жендэрийн тэгш байдлыг хангахад чиглэсэн тэргүүлэх чиглэлийн үйл ажиллагааг өргөжүүлэн эрчимжүүлэх, жендэрийн тэгш байдлыг хангахад чиглэсэн одоо ашиглаж буй хэрэгслийн талаарх мэдлэг, ойлголтыг нэмэгдүүлэхэд чиглэж байна. УУХҮЯ-нд холбогдох баримт бичиг, сургалтын материал хүлээлгэн өгснөөр өндөрлөх хуралдаан үргэлжилж байна.
Нар минутад мандаж минутад жаргана.
Үс засуулвал: 
Суудал: 
