Эмэгтэйчүүдийн холбоо ирэх жил хийх ажлаа хэлэлцэв

“Эрдэнэт үйлдвэр” ТӨҮГ-ын Эмэгтэйчүүдийн холбооны шинэ удирдлагууд үйл ажиллагаагаа идэвхжүүлэхээр төлөвлөж, цаашид хийх ажлаа хэлэлцлээ. 
Тус холбооны тэргүүлэгчдийн 9 дүгээр сарын 21-ний өдрийн хурлаар Судалгаа, шинжилгээний хүрээлэнгийн Ерөнхий инженер, доктор Х.Оюунтунгалаг Эмэгтэйчүүдийн холбооны тэргүүнээр сонгогдсон юм. 
Тэрээр үйлдвэрийн газрын бүтцийн нэгжүүдийн анхан шатны Эмэгтэйчүүдийн хорооны дарга нартай анхны хурлаа хийж, 2024 онд хийж хэрэгжүүлэх ажлын талаар санал солилцох үеэр, Үйлдвэрийн газрын эмэгтэй ажилтнуудын нийтлэг эрх ашиг, сонирхлыг илэрхийлж, уурхайчин бүсгүйчүүдийнхээ хөгжил, манлайлал, нийгэм, гэр бүл, хүүхдийн сайн сайхны төлөө үйл ажиллагаагаа чиглүүлнэ хэмээн онцоллоо. 
Мөн үйлдвэрийн газрын бүтцийн нэгжүүд, Эцэх эхийн зөвлөл болон олон нийтийн бусад байгууллагуудтай хамтран бүтээлч ажил, нөлөөллийн аян зохион байгуулж, сайн дурын клубуудыг дэмжиж ажиллахаа илэрхийлсэн юм. 
Эмэгтэйчүүдийн холбоо Орхон аймгийн Улаан загалмайн хороо, Эрдэнэт үйлдвэрийн ХАБЭА-н хэлтэс, “Эрдэнэт” сувиллын цогцолбортой хамтран эмэгтэй ажилтнуудыг анхны тусламж үзүүлэхэд сургаж, дадлагажуулах “Бид чадна” тэмцээнийг энэ ондоо багтаан зохион байгуулахаар болжээ.