Автотээврийн цехийн Технологийн тээврийн автомашины засварын хэсгийн цахилгаанчин Д.Пүрэвдорж Эрдэнэт үйлдвэрийнхээ түүхт 45 жилийн ойг угтаж 450 км зам туулах дугуйн аялалд өнөөдөр гарлаа. Түүнийг холын аянд гарахын өмнө сэтгэгдлийг нь сонссон юм.
-Та дугуйн спортоор хэдэн жил хичээллэж байна?
-Эрдэнэт хотод дугуйн зам нээгдэхэд дугуйн спортоор хичээллэж эхэлсэн. Одоо тав дахь жилдээ хичээллэж байна.
-Уралдаан тэмцээнд оролцож байв уу?
-Аймгийн болон Улсын чанартай тэмцээнүүдэд оролцож байсан. Хамгийн сүүлд Монголын бүх ард түмний спортын наадамд Орхон аймгийн дугуйн спортын “Хурд” клубын тамирчидтай хамтран оролцож, 15 аймгийн баг тамирчдаас долдугаар байрт шалгарсан.
-Зэрэг, цолтой юу?
-Саяхан дугуйн спортын II зэрэгтэй тамирчин болсон. Цаашид спортын мастерын болзол хангахын төлөө хичээж байна.
-Дугуйн спортоор хичээллэхийн сайхан нь юу вэ?
-Хээр талд дугуй унаад явж байхад сэтгэл санаа тайван, өөрийгөө чагнах, мэдрэх чөлөө олддог гэх үү дээ. Нийгмийн бухимдал, стрессээс өөрийгөө чөлөөлж, аз жаргалыг илүү мэдэрдэг. Мөн үеийн залуустаа үлгэр дуурайлал үзүүлэхийг зорьдог.
-Энэ удаагийн аяллын гол зорилго..?
-Эрдэнэт үйлдвэрийнхээ 45 жилийн ойг угтаж 450 км зам туулах маршрут гаргасан. Уурхайчин хүний тэсвэр тэвчээрийг харуулах, эрүүл амьдралын хэв маяг, дугуйн спортыг сурталчлах зорилготой. Хөвсгөлийн чиглэлд гарч байна.
-Өмнө нь дугуйгаар холын аялалд явсан уу?
-Амарбаясгалан хийд ороод, буцаад ирж байсан. Тэр үед 250 орчим км зам туулсан. Энэ удаа төрсөн нутаг, Хөвсгөл аймгийн Мөрөн сум орно. Чингүнжавын талбай дээр очоод, маргааш Булган аймгийн Овоотын хөтөл, тэгээд Орхон аймгийн А.Амарын талбайд барианд орох юм.
-Цагт хэдэн км/цагийн хурдтай явахаар төлөвлөв?
-Хөвсгөл аймаг орох замыг 16 цагт туулахаар төлөвлөсөн. Өөрөөр хэлбэл цагт 30 гаруй км зам туулна гэсэн үг.
-Ямар дугуй унаж яваа вэ?
-Хоёр дугуйтай явж байгаа. Нэг нь засмал замын зориулалтын дугуй, нөгөөх нь уулын дугуй. Дугуй хагарах зэргээр техникийн саатал гарвал сэлгэхээр тооцсон. Гол нь цаг алдахгүйг хичээнэ.
-Машин дагаж яваа юм байна. Ямар хүмүүс дэмжиж хамт яваа вэ?
-Арын албанд гэр бүлийнхэн, найз нөхөд маань машинтай дагаж яваа. Хэдийгээр хүүхдүүд маань жаахан ч ухаан орох үедээ ааваараа бахархана гэдэгт итгэдэг. Манайх хоёр хүүхэдтэй. Том нь дөрвөн настай, бага нь есөн сартай. Хүүхдүүддээ спортоор үлгэрлэхийг одооноос хичээж байна.
-Цаг агаарын байдлаа судалсан уу. Бэлтгэлээ хэр зэрэг хангасан бэ?
-Өөрийн бие, сэтгэлээ эртээс бэлдсэн. Хувийн бэлтгэлээ ч мөн базаасан. Дугуйн аяллаа есдүгээр сард төлөвлөж байсан ч цаг агаар цочир хүйтэрсэн учраас хойшлуулан 10-р сарын намрын налгар өдрүүдийг сонголоо.
-А.Амарын талбайд хэзээ ирэх билээ?
-10-р сарын 12-ны өдрийн үдээс хойш А.Амарын талбайд барианд орох болов уу. Энэ дашрамд, дугуй унах сонирхолтой хүүхэд, залуус Овоотын хөтөл гэсэн самбар дээр надтай нэгдэж, Эрдэнэтэд хамт орж ирэхийг уриалж байна. Миний утасны дугаар 99359275. Надтай хамт дугуйн аялалд явдаг, Тосгонд байдаг, “гоё гэртэй айл”-ын эзэн Ш.Банзрагч ах маань намайг Овоотын хөтөл дээр угтана. Харин дугуйн спортын “Хурд” клубынхэн маань гадагшаа тэмцээнд явсан. Гэсэн ч таньдаг дүү нар маань өөдөөс тосох болов уу, гэж найдаж байна. Дэмжиж байгаа Автотээврийн цехийн удирдлагууддаа, Эрдэнэт үйлдвэрийн Залуучуудын холбооны нийт гишүүддээ баярлалаа.
-Баярлалаа. Аян зам нь өлзийтэй байх болтугай. Амжилт ерөөе.
Нар минутад мандаж минутад жаргана.
Үс засуулвал: 
Суудал: 
