Баяжуулах үйлдвэрийн Бутлан тээвэрлэх хэсэгт “Үйлдвэрлэлийн томоохон ослоос урьдчилан сэргийлэх, хор уршгийг арилгах аврах ажиллагаа” сэдэвт гамшгаас хамгаалах үзүүлэх сургуулилт өнөөдөр боллоо. Энэхүү үзүүлэх сургуулийг Баяжуулах үйлдвэрийн мэргэжлийн анги зохион байгуулан явуулсан бөгөөд оролцогчид гурван тулгуурт аврах төхөөрөмж, ослын тэмдэг тэмдэглэгээ, өндрийн бүс, олс татлага, зөөврийн шатыг аврах ажиллагаанд ашиглах дадлага хийсэн юм.
Тус сургуулилтын зорилго нь гарч болзошгүй ослын үед ажилтныг богино хугацаанд аврах, бэлэн байдлыг хангах, ослын үед шуурхай үйл ажиллагаа явуулах нөхцөл бүрдүүлэх, үйлдвэрийн гамшгаас хамгаалах томилгоот мэргэжлийн ангийн удирдлага, бие бүрэлдэхүүн осол гэмтэл, аюулын үед аврах ажиллагаа явуулах, болзошгүй хор уршгийг арилгах үйл ажиллагаанд дадлагажуулахад чиглэгдэж байв.
Эрдэнэт үйлдвэрийн ХАБЭАХ-ийн Гамшгаас хамгаалах штабын тэргүүлэх мэргэжилтэн Р.Энхболд: Эрдэнэт үйлдвэрийн газрын 2023 оны гамшгаас хамгаалах сургуулийн хөтөлбөрт хоёр томоохон арга хэмжээ тусгагдсан. Үүний нэг нь Баяжуулах үйлдвэрийн мэргэжлийн анги, үйлдвэрлэлийн ослын үед өндрөөс аврах ажиллагааны үзүүлэх сургууль явуулах байсан. Энэ сургуулилт амжилттай явагдаж өндөрлөлөө. Үзүүлэх сургуульд Баяжуулах үйлдвэрийн мэргэжлийн ангийн удирдлага, том бутлуурын хэсгийн ажилчид, Гэрээт аврах гал унтраах 58 дугаар ангийн ээлжийн аврагч нар, үйлдвэрийн түргэн тусламжийн тасгийн ээлж хамт олон нийт 50 гаруй хүн оролцлоо. Мөн Баяжуулах үйлдвэрийн мэргэжлийн ангийн өнгөрсөн оны захиалгаар ирсэн аврах ажиллагааны тоног төхөөрөмж, багаж хэрэгслүүдийг туршиж, энэ сургуулилтын үеэр ашигласан нь ач холбогдолтой юм” гэв.
Нар минутад мандаж минутад жаргана.
Үс засуулвал: 
Суудал: 
