“Эрдэнэт үйлдвэр” ТӨҮГ-ын Байгаль орчин, ногоон хөгжлийн хэлтсээс санаачлан Хангал голын гольдрол дагуух хог хаягдлыг жил бүрийн намар цэвэрлэдэг уламжлалтай. Энэ жилийн арга хэмжээнд 27 бүтцийн нэгжийн 275 ажилтан хамрагдлаа.
Орхон аймгийн Дулааны цахилгаан станцын хойд талд байх гүүрнээс эхлэн голын гольдрол дагуу 11 км, голын эргээс хоёр тийш тус бүр 200 м талбайг хамруулан цэвэрлэлээ. Байгаль орчин, ногоон хөгжлийн хэлтсийн Ногоон хөгжил, нөхөн сэргээлтийн албаны дарга Б.Пүрэвсүрэн: “Манай үйлдвэрийнхэн 2023 оны Байгаль орчны менежментийн төлөвлөгөөнд тусгагдсаны дагуу Хангал голын гольдрол дагуух эзэнгүй хог хаягдлыг цэвэрлэх ажлыг хийлээ. Нийт 243 га талбайг цэвэрлэж, 28325 кг хог хаягдлыг зургаан техник хэрэгсэл ашиглан ачиж, төвлөрсөн хогийн цэгт буулгасан. Байгаль орчноо хайрлан хамгаалах, голын гольдролыг цэвэр ариун байлгах үйлсэд манайхан идэвх санаачилгатай сайн оролцлоо” гэв.