“Эрдэнэт үйлдвэр” ТӨҮГ-ын Ерөнхий захирал Г.Ёндон, Ерөнхий инженер Т.Батмөнх нар Баяжуулах үйлдвэрийн Хаягдлын аж ахуйд 16-р шинэ далан барих ажлын явцтай танилцлаа. Эрдэнэт үйлдвэрийн Хаягдлын аж ахуйн сангийн насжилтыг уртасгах, үйлдвэрлэлийн найдвартай ажиллагааг хангах зорилгоор шинээр 16-р далан барих ажлыг Ерөнхий захирлын тушаалаар 8-р сарын 21-нд эхлүүлсэн. Өнөөдрийн байдлаар 460 метрт уулын цулаар хучилт хийсэн бөгөөд төлөвлөгөөний дагуу шинэ далан барих ажлыг 11-р сарын 30 гэхэд дуусгах юм. Таван метр өндөртэй 3.5 км-ийн урттай далан барьж, байгуулах ажилд Эрдэнэт үйлдвэрийн Баяжуулах үйлдвэр, Ил уурхай, Автотээврийн цех, Геологи маркшейдерийн хэлтсийн 40 ажилтан, долоон төрлийн 15 нэгж техник, машин механизмаар ажил үүрэг гүйцэтгэж байна. Баяжуулах үйлдвэрийн Хаягдлын аж ахуйд таван метр өндөр, 1438,5 метр урт “М3” далангийн доод өргөн нь 42 метр, дээд өргөн нь 12 метр бөгөөд 330 мянган м3 уулын цул бэлтгэсэн чулуулгаар барих онцгой даалгавартай энэхүү ажил амжилттай явагдаж байна.
Баяжуулах үйлдвэрийн дарга М.Отгон хийсэн мэдээлэлдээ: “Одоогийн байдлаар 29 дэх өдрөө 16-р далан барих ажлыг гүйцэтгэж байна. Өнөөдрийн байдлаар 4,8 метрийн өндөртэй, 2045 метр элсэн далан барих ажил 60 хувьтай явж байна. Ажиллах хүн хүч, техник тоног төхөөрөмж бүрэн хангагдсан. 24 цагаар таслалтгүй ажиллаж байна. Үйлчилгээнд хоёр “Уаз” авто машин ажиллаж байгаа. Өнөөдрөөс таван бульдозероор ажил гүйцэтгэнэ. Ингэснээр хөдөлмөрийн бүтээмж нэмэгдэнэ. Одоогоор шинэ далан барих ажил төлөвлөгөөнөөс урьдчилсан байдлаар долоо хоногийн өмнө явж байна. Ерөнхий захирлын тушаалаар ажлын төв болон дэд хэсгүүд байгуулагдсан. Төв штаб долоо хоногийн хоёр дахь өдрийн 14:00 цагаас хуралдаж тулгамдаж буй асуудлаа хэлэлцэн ажиллаж байна” гэв.
“Эрдэнэт үйлдвэр” ТӨҮГ-ын Ерөнхий захирал Г.Ёндон: “Өнөөдөр зарим цехүүдийн өдөр тутам хийж буй ажлуудтай танилцаж байна. Дэлхийн уул уурхайн үйлдвэрүүдийн хувьд далангийн үйл ажиллагаа шинэчлэгдэж байна. Цаашид бид Хаягдлын аж ахуйгаа нүүлгэн шилжүүлэх зорилго тавьж, ТЭЗҮ, зураг төсөл, инженер геологийн судалгааны ажлууд хийгдээд явж байна. Шинэ далан барьж байгуулах ажил тодорхой хугацаанд үргэлжилнэ. Жил бүр бидний боловсруулж буй хүдрийн хэмжээ нэмэгдсэнээр Хаягдлын аж ахуйн хаягдал материал төдий хэмжээгээр өснө гэсэн үг. Тэгэхээр үйлдвэрлэлийн тасралтгүй үйл ажиллагааг ханган аюулгүй, найдвартай ажиллах үүднээс 16-р шинэ даланг барьж байгуулах ажлыг гүйцэтгэж байна” гээд 40 тоннын белазын сэлбэгийг цаг хугацаа алдахгүй нийлүүлэх, техникийн бэлэн байдалд онцгой анхаарч ажиллахыг үүрэг болгов.
Нар минутад мандаж минутад жаргана.
Үс засуулвал: 
Суудал: 
