“Эрдэнэт үйлдвэр” ТӨҮГ үйл ажиллагаандаа хөдөлмөрийн аюулгүй ажиллагааны удирдлагын тогтолцоо ISO-45001 олон улсын стандартыг 2021 оноос хэрэгжүүлсэн бөгөөд стандартын хэрэгжилтийн хоёр дахь удаагийн магадлан аудитыг өнөөдрөөс эхлүүллээ.
Магадлан аудитын нээлтийн хурал өнөөдөр болж, үйлдвэрийн газрын болон цех нэгжүүдийн удирдлага, ХАБЭА-н ажилтнууд, Магадлан аудит хийх Эс Эф Си ЭС компанийн аудиторууд оролцлоо. Аудиторууд ХАБЭА хэлтэс, ЗМЗ, Ил уурхай, Баяжуулах үйлдвэр, Ган бөөрөнцгийн цех, Дулааны цахилгаан станц, Барилга засварын цех, Спорт цогцолбор зэрэг бүтцийн нэгжид ажиллаж, аудитын нотлох баримтуудыг үндэслэн шалгаж, дүгнэлт гаргах юм.
Магадлан аудит хийснээр стандартын хэрэгжилт ямар шатанд явааг дүгнэхийн зэрэгцээ цаашид сайжруулах зүйлсийг хөндлөнгийн байдлаар олж тогтоож, гаргаж өгнө гэж тэргүүлэх аудитор Г.Чогдон хэллээ. ISO-45001 стандартын хэрэгжилтийн эхний магадлан аудит 2022 онд хийгдсэн юм. “Эрдэнэт үйлдвэр” ТӨҮГ-т энэхүү стандартын давтан баталгаажуулалт 2024 онд хийгдэх юм. Үүний бэлтгэл ажлын хүрээнд ийнхүү магадлан аудит хийж байгаа ажээ. Нээлтийн хурлын үеэр Ерөнхий инженер Т.Батмөнх: “Эрдэнэт үйлдвэрийн гол цөм бол хүн. Ажилчдын эрүүл мэнд, аюулгүй байдлыг хамгаалах нь бидний баримталдаг гол зарчим. Бид өнгөрсөн хугацаанд олон улсын ISO-45001 стандартыг хэрэгжүүлэгч байгууллага болсон. Өнөөдөр хоёр дахь шатны магадлан аудит хийлгэж байна. Мэргэжлийн өндөр ур чадвартай, туршлагатай аудиторууд бидний хэрэгжүүлсэн ажилд үнэлэлт дүгнэлт өгнө. Энэхүү стандартыг ажилтан бүр хэрэгжүүлэх ёстой. Аюулгүй ажиллагааны талаарх ажилтнуудын мэдлэг, мэдээллийг сайжруулах, түүнчлэн үйлдвэрийнхээ үйл ажиллагааг нэн түрүүнд аюулгүй байдлаар зохион байгуулах нь бидний үндсэн чиг үүрэг. Үүнд чиглэсэн үйл ажиллагааг тасралтгүй явуулж, мэргэжлийн байгууллагатай хамтарч ажиллаж байгаа нь тодорхой үр дүн өгнө гэдэгт итгэлтэй байна” гэв.
Нар минутад мандаж минутад жаргана.
Үс засуулвал: 
Суудал: 
