“Эрдэнэт үйлдвэр-45” эрдэм шинжилгээний хурал эхэллээ

Эрдэнэт үйлдвэрийн дэргэдэх “Эрдэнэт цогцолбор” дээд сургууль дээр уул уурхайн эрдэмтэн судлаачид чуулж байна.  Тэд геологи, уул уурхай, экологи, эрдэс боловсруулалт зэрэг салбарын цогц асуудлаар  шинжилгээний судалгааны бүтээлээ танилцуулахаар “Эрдэнэт үйлдвэр-45” эрдэм шинжилгээний бага хуралд оролцож байна. 

Бага хурлыг “Эрдэнэт цогцолбор” дээд сургуулийн захирал, доктор Д.Зоригтхүү нээж, “Эрдэнэт үйлдвэрийн 45 жилийн ойг угтаж, “Эрдмийн аян” сургууль сурталчлах аяны хүрээнд уул уурхай, нийгмийн салбарын эрдэмтэн судлаачдын ашигт малтмалын нөөц, орд газрын ашиглалт, байгаль орчныг хамгаалах менежмент, нийгмийн хариуцлагын чиглэлээр хийсэн судалгааны ажлын үр дүнг олон нийтэд таниулах, сургалт эрдэм шинжилгээ үйлдвэрлэлийн уялдаа холбоог боловсронгуй болгох, шинэ санал санаачлага дэвшүүлэх, харилцан туршлага солилцох зорилгоор энэхүү эрдэм шинжилгээний бага хурлыг зохион байгуулж байна. Эрдэнэт үйлдвэр, Шинжлэх ухааны академи, ШУТИС-ийн хамтын ажиллагааны хүрээнд үйлдвэрийн үйл ажиллагаанд тулгамдаж буй асуудал, үр ашгийг нэмэгдүүлэх талаар олон туршилт судалгааны ажил хэрэгжүүлсэн. Тиймээс эрдэмтэн судлаачдын олон талын эрдэм шинжилгээний судалгаа, инновацийн шийдэл  Эрдэнэт үйлдвэрийн цаашдын хөгжилд чухал байр суурь эзэлдэг” гэж бага хурлын ач холбогдлыг онцоллоо.   

Бага хурлаар хэлэлцэх эрдэм шинжилгээний бүтээл, судалгааны илтгэлийг шүүн тунгаах шүүгчдээр Эрдэнэт цогцолбор” дээд сургуулийн Эрдмийн зөвлөлийн гишүүн, доктор, Төрийн соёрхолт Ж.Баатархүү, ШУТИС-ийн Геологи уул уурхайн сургуулийн Зөвлөх профессор, Шинжлэх ухааны доктор Д.Нанзад, Эрдэнэт цогцолбор дээд сургуулийн захирал, доктор Д.Зоригтхүү, Ил уурхайн дарга, доктор Д.Нямдорж, Ерөнхий геологич, доктор Д.Алтанхуяг нар ажиллаж, шилдэг илтгэлийг тодруулах юм. 
“Эрдэнэт үйлдвэр-45” эрдэм шинжилгээний бага хурал хоёр өдөр үргэлжлэх бөгөөд эхний өдөр геологи уул урхай, экологи, уул уурхай, хаалтын менежмент сэдвээр хуралдах бол маргааш эрдэс боловсруулалт, металлурги, нийгмийн хариуцлагын үр дүн, цаашдын зорилт сэдэвт илтгэлүүд танилцуулж, хэлэлцэх юм байна.