“Эрдмийн уурхай” сэдэвт нэг сарын аян өрнөж байна

“Эрдэнэт цогцолбор” дээд сургуулийн үйл ажиллагааг сурталчлах нэг сарын аян өрнөж байна. “Эрдмийн уурхай” сэдвийн дор зохион байгуулж буй нэг сарын аяны хүрээнд Хөдөлмөрийн аюулгүй ажиллагааны чиглэлээр гарсан ном товхимол, сургуулийн эрдэмтэн багш нарын бүтээлээр үзэсгэлэн гаргав. 

Үзэсгэлэнд Эрдэнэт үйлдвэр төрийн өмчит үйлдвэрийн газар ажиллаж буй докторуудын эрдмийн ажил, судалгаа шинжилгээний бүтээлүүдийн дээжээс дэлгэн сонирхууллаа. Мөн сургуулийнхаа сургалтын талаар танилцуулга, товхимол тарааж, хүмүүсийн сонирхсон асуултад дэлгэрэнгүй хариулт өгсөн юм. 

Түүнчлэн сургуулийнхаа бакалавр, магистр, түр болон богино дунд хугацааны сургалтыг сурталчлах ажлыг Эрдэнэт үйлдвэрийн захиргааны нэг, хоёрдугаар байранд зохион байгуулав. Энэ талаар Санхүү менежментийн тэнхимийн эрхлэгч Н.Цэрмаагаас тодруулахад: “ Манай нийгмийн ухааны салбарын эчнээ ангид С дипломтой эсвэл 30-аас дээш насны таван жил тухайн мэргэжлээр ажилласан хүмүүс суралцах боломжтой. Уг сургалт цахим болон танхимын хэлбэрээр явах учраас үйлдвэрийн ажилчдад их боломж олдож байна. Үйлдвэрт олон жил ажилласан, ахиж дэвшихийг хүсэж байгаа залуучууд албан газраасаа тодорхой хэмжээний сургалтын хөнгөлөлт эдлэх, тус сургуулиас цагийн уян хатан байдлыг санал болгосон сургалтад хамрагдана. Нийгмийн ухааны салбарт нягтлан бодох бүртгэл, санхүү, үйлдвэрлэлийн менежмент, гадаад хэлний орчуулагч мэргэжлээр элсэлт авч байна. Санхүү болон нягтлан бодох бүртгэлийн мэргэжлүүд үндэснийхээ хэмжээнд магадлан итгэмжлэгдсэн. Итгэмжлэгдсэн хөтөлбөрүүдийн дагуу 20-оос дээш жилийн ажлын туршлагатай багш нар хичээл заана. Энэ сарын аяны хугацаанд зөвхөн үйлдвэр дээр биш, Орхон болон Булган аймгийн хэмжээнд сургуулийнхаа бүх төрлийн үйл ажиллагааг танилцуулж байна. Инженер болон нийгмийн ухааны салбарын хөтөлбөрүүд, чадамжийн буюу түр сургалтуудыг танилцуулах ажлыг зохион байгуулна. Мөн 10 жилийн хүүхдүүд, энгийн ард иргэдэд төсөл хэрхэн бичих талаар үнэ төлбөргүй зөвлөмж өгч байна. Сонирхсон хүмүүс манай тэнхим рүү хандаж, багш нараас хувийн зөвлөгөө авч болно” гэж ярилаа.