“Найрамдлын Эрдэнэс” зуслангийн амрагчид нэмэгджээ

Энэ онд “Найрамдлын Эрдэнэс” зусланд өмнөх оноос 204 хүүхэд илүү амарсан байна. Тус зусланд  6-р сарын 10-аас  8-р сарын 5   хүртэл нийт 8 ээлжээр 6-18 насны 3832  хүүхэд багачууд амарсан ч  эрхийн бичгийн эрэлт хэрэгцээ харьцангуй их байсан аж. Зуслангийн хүчин чадал нэг ээлжид 500 хүүхэд хүлээн авах боломжтойгоос “Эрдэнэт” үйлдвэрийн ажилтнуудын хүүхдүүдэд  зориулан 250 эрхийн бичгийг цех, нэгжүүдэд хуваарийн дагуу олгожээ. Үлдсэн 250 эрхийн бичгийг онлайн хэлбэрээр борлуулсан байна. “Борлуулалт цахимаар явагдсанаас дамлан зарах, хуурамчаар үйлдэх, цахим гэмт хэргийн тохиолдлууд гарах эрсдэлийг  арилгаж,  дэлхийн хаанаас ч эрхийн бичгийг авах боломж бүрдсэн. Мөн эрхийн бичиг зардаг цэгт  дараалал үүсгэх нөхцөлийг бууруулж, цаг хугацаа хэмнэж,  эрхийн бичгээ мартсан, гээсэн тохиолдолд цахим бүртгэлээс хянах боломжтой, амрагчдын мэдээллийг гараар тэмдэглэдэг байсныг халсан зэрэг давуу тал үүссэн. Гэвч нэг амрагч хэд хэдэн эрхийн бичиг захиалснаар дараагийн амрагчдын захиалах боломжийг хаах,  үйлчлүүлэгчид тодорхой хугацаанд QR код, мөнгө төлөх дансаа хүлээх тохиолдол гарсан. Иймээс Зуслангийн үйл ажиллагаа болон программыг сайжруулахын тулд 2024 онд  Эрхийн бичиг зарах цахим бүртгэлийн  олон  үйлдэлтэй алхмуудыг багасгаж,үнийн хөөрөгдөлтэйгөөр  дамлан зарах, хуурамчаар үйлдэх, цахим гэмт хэргээс урьдчилан сэргийлэх зорилгоор эрхийн бичгийг давтагдашгүй код, тамга тэмдэгтэй болгохоор төлөвлөөд байна” гэж СААЖЦ-ийн Үйлчилгээний мэргэжилтэн Н.Эрдэмсайхан ярилаа.