Удирдлагуудын шуурхай зөвлөгөөний тойм

Уурхайчид 8 дугаар сард 102 мянган тонн хүдэр олборлолоо
Үйлдвэрлэлийн хэлтсээс өнгөрсөн 8 дугаар сарын үйлдвэрлэлийн төлөвлөгөөний биелэлтийг мэдээллээ. Уурхайчид өнгөрсөн сард 102 мянган тонн хүдэр олборлож, төлөвлөгөөг 103.2 хувиар биелүүлсэн байна. Уулын цул гаргалт 98 хувь, хөрс хуулалтын төлөвлөгөө 93 хувийн биелэлттэй гарчээ. Баяжуулах үйлдвэрт хүдэр өгөлт 107.4 хувиар, өрөмдлөгийг төлөвлөгөөнөөс 30 тууш метр илүү гүйцэтгэж,  100 хувиар биелүүлсэн байна. Баяжуулах үйлдвэрийнхэн 3140 мянган тонн хүдэр боловсруулж, төлөвлөгөөг 106 хувиар биелүүлсэн бол хүдэр дэх зэс, молибдены металл авалт 100-102.4 хувиар давж биелжээ. Өнгөрсөн сард 50519 тонн зэсийн баяжмал, 522 тонн молибдены баяжмал тус тус үйлдвэрлэн, экспортод ачуулснаар төлөвлөгөөт үзүүлэлт 104.1-110.5 хувиар биеллээ. Ачигдсан баяжмалын чанарын төлөвлөгөө  зэсийнх 102.6 хувь, молибдений чанар 104.4 хувиар биелсэн дүнтэй байна. Оны эхний найман сарын байдлаар үйлдвэрлэлийн төлөвлөгөө уулын цул гаргалт болон хөрс хуулалтын ажлаас бусад үзүүлэлтээр 100-аас дээш хувийн биелэлттэй байгааг Үйлдвэрлэлийн хэлтэс мэдээлэлдээ онцоллоо.

     
 
Сэлэнгэ аймагт хийх нөхөн сэргээлтийн ажлын тал хувийг гүйцэтгээд байна
Сэлэнгэ аймгийн Ерөө сумын нутагт алтны шороон ордын олборлолтын улмаас эвдэрсэн 8 байршил 2000 га талбайд Эрдэнэт үйлдвэр нийгмийн хариуцлагын хүрээнд өөрийн хөрөнгө оруулалтаар техникийн нөхөн сэргээлтийн ажил эхлүүлсэн. Энэ ажил төлөвлөгөөний дагуу үргэлжилж байна. Нөхөн сэргээлтийн ажлын гүйцэтгэгч  “Жинжи майнинг” компани нийт 807 га талбайд нөхөн сэргээлт хийж байгаа бөгөөд өнөөдрийн байдлаар 455.1 га буюу 56.8 хувь, “Тотал идеал” компани 429.1 га талбайнхаа  259.7 га буюу 61 хувьд нь нөхөн сэргээлт хийжээ. Байгаль орчин, ногоон хөгжлийн хэлтсээс нөхөн сэргээлт хийгдсэн талбайд хяналт тавих, мэдээлэл солилцох талаар  Сэлэнгэ аймаг болон Ерөө сумын удирдлага, Экологийн цагдаагийн газарт албан хүсэлт илгээж, хамтран ажиллаж буйг хэлтсийн дарга Ж.Жавхланбат мэдээллээ. Ерөө сумын газар нутагт хийх нөхөн сэргээлтийн ажлыг ирэх 11 дүгээр сард дуусгахаар төлөвлөж байгаа юм байна.

Эрдэнэт цогцолбор дээд сургууль “Эрдмийн уурхай” аян өрнүүлж, Спорт цогцолбор намар цагийн нээлтээ хийнэ
Хичээлийн шинэ жил эхэлсэнтэй холбогдуулан урлаг спортын олон талт хөтөлбөрүүд намар цагийн үйл ажиллагаагаа нээж байна. Өнгөрсөн бямба гаригт “Эрдэнэт цогцолбор” дээд сургуулиас “Эрдмийн уурхай” боловсролыг дэмжих сарын аяныг нээв. Нээлтийг тус сургуулийн Эрдмийн зөвлөлийн гишүүд, ахмад багш, ажилтан, мэргэжлийн тэнхим алба нэгжийн удирдлага, төгсөгчдийн төлөөлөл, оюутан сурагчид хүндэтгэлийн жагсаалаар эхлүүлж, урлаг соёлын тоглолт, мэндчилгээгээр үргэлжилсэн. Мөн Нягтлан бодох бүртгэлийн тэнхимийн төгсөгчид банк санхүү, татвар нийгмийн даатгалын талаар “Нээлттэй хаалга”-ны өдөрлөг зохион байгуулж, оюутнууд, ахлах ангийн сурагчдын дунд 3х3 сагсан бөмбөг, шатрын тэмцээн зохион байгууллаа. “Эрдмийн уурхай” аян нэг сарын турш өрнөж, Эрдэнэт цогцолбор дээд сургуулийн үйл ажиллагаа, сургалтын мэдээлэлийг иргэдэд сурталчлах юм. Тэгвэл Спорт цогцолборын намар цагийн үйл ажиллагаа өнөөдөр усан бассейнд нээгдэнэ. Энэ удаагийн нээлтийн ажиллагаагаа өвөрмөц онцлогтой нээхээр зохион байгуулж буйг тус цогцолборын дарга Ш.Даваахүү мэдээлж, бүтцийн цех нэгжийн удирдлагуудыг ирж, оролцохыг уриаллаа.