Эрдэнэт үйлдвэрийн хүчин чадал өсөн нэмэгдэж, далангийн ашиглалтын хугацаа богиносож байгаатай холбогдуулан Баяжуулах үйлдвэрийн хаягдлын сангийн насжилтыг уртасгах, найдвартай ажиллагааг хангах зорилгоор шинэ 16 дугаар далан барих ажил энэ сарын 21-нээс эхэлсэн. “Онцгой даалгавар”-т энэхүү ажлыг хариуцаж буй Төв ажлын хэсгийн хуралдаан Хаягдлын аж ахуйд болж, холбогдох мэргэжилтнүүд мэдээлэл, санал солилцож, тулгамдаж буй асуудлаа хэлэлцэн шийдвэрлэлээ.
Хаягдлын аж ахуйд шинээр 3.5 км урт, таван метрийн өндөр 16 дугаар далан барихдаа эхний ээлжинд хураагдсан элсээр элсэн далан байгуулж, дээгүүр нь уулын цулаар 0.5 метр хучилт хийж, дараа нь маркшейдерүүдийн хяналт шалгалт дор нарийн хэмжээс, засал хийнэ гэж БҮ-ийн ХАА-н хэсгийн ахлах мастер, 16-р далангийн түр Ажлын хэсгийн дарга Б.Баярбат ярилаа.
Одоогоор Хаягдлын аж ахуйд Баяжуулах үйлдвэр, Автотээврийн цех, Ил уурхай, Геологи маркшейдерийн хэлтсийн 90 орчим ажилчин, 32 техник, машин механизм 12 цагийн хоёр ээлжээр ажиллаж байгаа юм. Шороон далан барих, булинга дамжуулах, хуваарилах шугамыг буулгах, угсрах иж бүрэн бүтээн байгуулалтыг ирэх 11 дүгээр сарын 30-нд дуусгах төлөвлөгөөтэй ажиллаж байна.