“Эрдэнэт үйлдвэр” ТӨҮГ-ын дэргэдэх “Эрдэнэ цогцолбор” дээд сургууль ХБНГУ-ын FAV Service GmbH компанитай хамтын ажиллагааны гэрээ байгуулан ажиллаж байна.
Энэ хүрээнд Эрдэнэтийн залууст ХБНГУ-д цахилгаанчин, үйлдвэрийн механик, гагнуурчин зэрэг НАРИЙН МЭРГЭЖИЛ эзэмшин, тэндээ ажиллах боломжийг нээж байгаа юм. Тус сургуулийн эрдэмтэн багш нар 18-25 насны залууст Германд боловсрол эзэмшээд, тэндээ үргэлжлүүлэн ажиллах боломжийн талаар мэдээлэл өгөх өдөрлөг өнөөдөр зохион байгууллаа.
Залуус ХБНГУ-д үнэ төлбөргүй мэргэжил эзэмшихийн тулд Герман хэлний В2 ТҮВШНИЙ МЭДЛЭГ-тэй байх ёстой бөгөөд энэ хичээлийн жилийн туршид “Эрдэнэ цогцолбор” дээд сургууль Герман хэлний сургалт зохион байгуулахаар болжээ. Энэхүү сургалтад Ерөнхий боловсролын сургуулиа амжилттай төгссөн хэн бүхэн хамрагдах боломжтой гэж тус сургуулийн эрдэмтэн нарийн бичгийн дарга Д.Заяабаатар ярилаа.
Герман хэлний найман сарын сургалтаа амжилттай дүүргэж, В2 түвшний сертификат гардсан залуус визэнд орж, ХБНГУ-д үнэ төлбөргүй суралцах үүд хаалга нээгдэнэ. Түүнчлэн суралцах хугацаандаа ТЭТГЭЛЭГ авна гэж тэрээр нэмж мэдээллээ.
Мөн хоол үйлдвэрлэл, эрүүл мэндийн салбарын чиглэлээр ЭМЭГТЭЙЧҮҮД суралцах боломжтой ажээ.