Эрдэнэт үйлдвэр нийгмийн хариуцлагынхаа хүрээнд санаачлан, хөрөнгө оруулж буй Эрдэнэт-Хангал-Хялганат чиглэлийн авто замын бүтээн байгуулалт 80 гаруй хувийн гүйцэтгэлтэй байна. Нийт 64 км авто зам тавих гурван багц бүхий уг төслийн Эрдэнэт хотын тойрог уулзвараас Хангалын гүүр хүртэлх 30 км замыг “Замын битум” компани, Хялганат тосгоны гүүр хүртэлх 23.6 км авто замын ажлыг “Хурдны зам” компани тус тус гүйцэтгэж байгаа бол Сэлэнгэ амралтын бааз чиглэлд тавих технологийн 10.4 км авто замыг “Жавхлан харгуй” компани хариуцжээ. Эдгээр компаниудын гүйцэтгэл, техник технологийн бэлэн байдал зэрэгт ”RCS” зөвлөх компани зөвлөх үйлчилгээ, хяналт үзүүлж байгаа аж.
Өнөөдрийн байдлаар, “Замын битум” компанийн 30 км замын гүйцэтгэл 85 хувьтай байна. Одоо асфальт хучилтын ажил хийгдэж байгаа бөгөөд ажил гүйцэтгэх гэрээний хугацаа болох 10 сарын 30-нд багтааж, дуусгахаар төлөвлөжээ. Энэ чиглэлийн замд нийт 4 гүүр баригдана. Одоогоор гурван гүүр бүрэн дуусаж, үлдсэн гүүрийн ажил 80 хувьтай үргэлжилж байна. “Хурдны зам” компанийн тавьж байгаа 23.6 км замын 5 км орчимд хучилт дутуу үлдсэн бол Сэлэнгэ амралтын баазын чиглэлийн 10 км замын асфальт хучилт удахгүй эхлэх юм. Учир нь “Найрамдлын Эрдэнэс” хүүхдийн зуслангийн сүүлийн ээлж дууссаны дараа замын ажлаа үргэлжлүүлэхээр хүлээжээ. Нөгөө талаас энэ жил бороо хур харьцангүй их байсан нь замын ажил удаашрах шалтгаан болсон байна. Гэсэн хэдий ч гэрээний хугацаанд багтааж, авто замаа ирэх 11 сард бүрэн дуусган ашиглалтад хүлээлгэж өгөхөөр ажиллаж байна.
Эрдэнэт-Хангал-Хялганат чиглэлийн авто замын төслийн гүйцэтгэл, чанар стандартад Эрдэнэт үйлдвэрийн Барилга, байгууламжийн хяналт, төлөвлөлтийн хэлтэс хяналт тавьж, газар дээр нь ажиллаж байгаа юм. Олон улсын стандартын шаардлага хангасан зам хүлээж авахын тулд лабораторийн туршилт, геодезийн хэмжилтийг өдөр тутам гүйцэтгэл бүрт хийж байгааг Хяналтын инженер Д.Отгонбаатар онцлов. Түүнчлэн Эрдэнэт үйлдвэр захиалагчийн хувьд гүйцэтгэлийн дагуу санхүүжилтийг саадгүй олгож, харилцан хамтран ажиллаж байгаа гэв.
Нар минутад мандаж минутад жаргана.
Үс засуулвал: 
Суудал: 
