Эрдэнэт үйлдвэрийн захиргаа, тус үйлдвэрийн дэргэдэх ҮЭ-ийн холбооны хооронд үйлдвэрийн газрын хөдөлмөрийн харилцаа, нийгмийн хамгааллын асуудлыг зохицуулах, оролцогч талуудын үүргийг тодорхойлон эрх ашгийг хамгаалж, баталгаажуулах зорилго бүхий “Хамтын гэрээ”-г хоёр жил тутамд шинэчлэн байгуулж, хэрэгжүүлдэг. 2022-2023 онд хэрэгжүүлж буй “Хамтын гэрээ”-ний хүчин төгөлдөр хугацаа гэрээнд заасны дагуу энэ онд дуусгавар болох бөгөөд хэрэгжүүлэгч талууд оны эцэст гэрээний биелэлтийг дүгнэж, шинэ гэрээнд гарын үзэг зурж баталгаажуулдаг журамтай.
Харин энэ жилийн тухайд “Эрдэнэт үйлдвэр” ТӨҮГ-ын 2024 оны бизнес төлөвлөгөөг батлахтай холбоотойгоор түүнд тодорхой саналууд тусгах шаардлагатай байгаа тул “Хамтын гэрээ”-ний биелэлтийг тогтсон хугацаанаас 3 сарын өмнө дүгнэж, хэлэлцэхээр болсон байна. Иймээс Эрдэнэт үйлдвэрийн захиргаа болон ҮЭ-ийн холбооны төлөөллөөс бүрдсэн ажлын хэсгийнхэн маргааш буюу 8 сарын 25-нд хуралдаж, 2022-2023 онд хэрэгжүүлсэн “Хамтын гэрээ”-ний биелэлтийг дүгнэж, 2024-2025 онд хэрэгжүүлэх ажлын төлөвлөгөө, шинэ гэрээний төслийг хэлэлцэх юм.
“Хамтын гэрээ”-ний хэлэлцээр, төлөвлөгөөг боловсруулах ажлын явцын талаар Нийгмийн харилцааны газрын Хамтын ажиллагаа төслийн албаны дарга Д.Эрдэнэбатаас тодруулахад “Өмнөх жилүүдэд хэрэгжүүлж ирсэн “Хамтын гэрээ”-ний зарим зүйл заалт дээр үйлдвэрийн захиргаа, ҮЭ-ийн холбооны хооронд саналын зөрүүтэй, зөвшилд хүрэхгүй асуудлууд багагүй гарч, гэрээний хэлэлцээр сунжрах, уртсах зэрэг хүндрэлүүд байсан. Харин 2019 онд Эрдэнэт үйлдвэр төрийн өмчит үйлдвэрийн газар болсноор Хамтын гэрээний хэлэлцээр, зөвшилцөл шуурхай, шийдэлд хүрэх зэрэг эерэг дэвшлүүд гарсан. Энэ удаа ч бид хоёр талын зөвшилцөл ойлголцлыг чухалчилж, богино хугацаанд шинэ гэрээний төслөө боловсруулахыг зорьж байна” гэсэн юм.